चैत्र २३, २०७३- बैंक तथा वित्तीय संस्थाले ग्राहकलाई हरेक कारोबारको सूचना (सतर्कता सन्देश) दिनुपर्ने भएको छ । राष्ट्र बैंकको भुक्तानी प्रणाली विभागले करिब दुई महिनाअघि दिएको उक्त निर्देशन आउँदो वैशाख १६ गतेदेखि पूर्ण रूपमा कार्यान्वयनमा आइसक्नुपर्ने छ । त्यसपछि प्रत्येक ग्राहकको प्रत्येक कारोबारको सूचना अनिवार्य रूपमा एसएमएसमार्फत दिनुपर्ने छ ।

पछिल्लो समयमा एटीएममार्फत चोरी बढेपछि ग्राहकलाई सचेत बनाउन यसो गर्न लागिएको हो । ‘प्रत्येक कारोबारपछि अनिवार्य रूपमा सम्बद्ध ग्राहकलाई तत्काल एसएमएस अलर्ट दिनुपर्ने छ’ राष्ट्र बैंकको निर्देशनमा भनिएको छ ।

यस्तो एसएमएस सुविधाबापत थप शुल्क लिन नपाइने पनि राष्ट्र बैंकले जनाएको छ । ‘यो ग्राहकले खाता खोलेबापत बैंकले दिने सुविधा हो । त्यसैले एसएमएसमार्फत थप शुल्क उठाउन पाइँदैन,’ राष्ट्र बैंकका एक उच्च अधिकारीले भने ।

निर्देशनमा शुल्कबारे केही उल्लेख नभए पनि बैंकले नि:शुल्क एसएमएस सुविधा दिनैपर्ने उनले बताए । हाल बैंक तथा वित्तीय संस्थाले अतिरिक्त सेवाअन्तर्गत थप शुल्क लिएर एसएमएस, इमेललगायतमा सतर्कता–सन्देश दिँदै आएका छन् । त्यस्तो शुल्क बैंकअनुसार फरक–फरक छ ।

बैंक तथा वित्तीय संस्थाले भने नि:शुल्क एसएमएस सुविधा दिन नसकिने बताएका छन् । एसएमएस सुविधा दिएबापत आफूहरूले मोबाइल सेवा प्रदायकहरूलाई पैसा तिर्नुपर्ने भएकाले ग्राहकलाई नि:शुल्क सेवा दिन नसकिने उनीहरूको तर्क छ ।
‘राष्ट्र बैंकको निर्देशनअनुसार बैंक तथा वित्तीय संस्थाले ग्राहकलाई सतर्कता सन्देश दिन सुरु गरेका छन्,’ बैंकर्स संघका कार्यकारी सदस्य भुवन दाहालले भने, ‘तर त्यसबापत ग्राहकले शुल्क तिर्नुपर्छ ।’

गत पुससम्म बैंक तथा वित्तीय संस्थामा १ करोड ८२ लाख निक्षेप खाता खुलेका छन् । ऋण खाताको संख्या ११ लाख ५६ हजार छ । सोही अवधिमा २२ लाख ३६ हजार ग्राहकले मोबाइल बैंकिङ सुविधा लिएका छन् ।

इन्टरनेट बैंकिङ सेवा लिनेको संख्या ५ लाख ६४ हजार छ । बैंक तथा वित्तीय संस्थाले करिब २ हजार एटीएममार्फत बैंकिङ सेवा दिइरहेका छन् । पुससम्म साढे ४८ लाख एटीएम कार्ड जारी भएको राष्ट्र बैंकको तथ्यांक छ ।