पुस ८, २०७३- प्रधानमन्त्री पुष्पकमल दाहालले मधेस, पहाड र हिमाललाई जोड्ने सुत्र मात्रै राष्ट्रवाद हुने बताएका छन् ।

शुक्रबार गोरखा सदरमुकाममा नवौं गोरखा महोत्सवको उद्‌घाटन गर्दै उनले भने, ‘मधेसीलाई हेपेर पर धकेलेर संविधान कार्यान्वयन हुँदैन ।’ सत्ता पक्ष र प्रतिपक्षलाई मिलाउन संविधान संशोधन प्रस्ताव दर्ता गरिएको उनले बताए ।

‘मधेस, पहाड र हिमाललाई टुक्र्याउने राष्ट्रवाद हुँदैन,’ उनले भने । दलहरुबीच प्याकेजमै सहमति हुन आवश्यक रहेको दाहालले औंल्याए । ‘संविधान संशोधन, महाअभियोग र निर्वाचन लगायतका विधयेक प्याकेजमै टुङ्गो लगाउन सकिन्छ ।’

प्याकेजमै सहमति हुन नसके प्रक्रियामा जान संसदको अवरोध खुलाउनु पर्ने उनको भनाइ थियो । ‘देशलाई सधैं अनिर्णयको बन्दी बनाएर हुँदैन,’ उनले भने, ‘संसद खुलाएर बहस छलफल गर्दै प्रक्रियामा जान सकिन्छ ।’ संसदमा भएको अवरोधकै कारण अख्तियार प्रमुख लोकमानसिंह कार्की विरुद्धको महाअभियोग अघि बढाउन नसकिएको बताए ।

कांग्रेस, एमालेले पहिले गरेको प्रस्ताव अनुसार नै संविधान संशोधन प्रस्ताव संसदमा दर्ता भएको उनले बताए । ‘एमाले अध्यक्षले गरेको प्रस्ताव नै मैले अघि सारेको हुँ,’ उनले भने, ‘यो मेरो प्रस्ताव होइन, कांग्रेस, एमाले र मधेसीलाई मिलाउन संसदमा दर्ता गराएको हुँ ।’ परिवर्तनहरुलाई संस्थागत गर्दै संविधान कार्यान्वय गर्ने उनले प्रतिवद्धता जनाए ।

‘परिवर्तनका लागि बगेका रगत भुलेको छैन,’ उनले भने, ‘संविधान सभाबाट संविधान, संघीयता, धर्मनिरपेक्षता, गणतन्त्रको जन्मदाता माओवादी हो ।’ सुशील कोइरालालाई राष्ट्रपति र केपी शर्मा ओलीलाई प्रधानमन्त्रीको पद दिएर संविधान बनाएको उनले स्मरण गरे ।

‘केपी ओली मैले चाहेर प्रधानमन्त्री भएको हुँ,’ उनले भने, ‘अप्ठ्यारो परेको बेला सरकार ढाल्न बुद्धि छाड्नुस ।’ असन्तुष्ट मधेसी, थारु, जनजातिलाई अपमान विभेद गर्नु देशभक्ति नहुने उनले बताए ।

प्रधानमन्त्रीले शुक्रबार नै मुच्चोक गाविस स्थित ६ मेगावट क्षमताको दरौंदी कालिका हाईड्रोको उद्घाटन गरेका थिए । शिलान्यास कार्यक्रममा उर्जा मन्त्री जर्नादन शर्माले गोरखा छिट्टै लोडसेडिङ मुक्त हुने घोषणा गरे । उनले छिट्टै बुढीगण्डकी जलविद्युत आयोजनाको समेत शिलान्यास हुने प्रतिबद्धता जनाए । कार्यक्रममा स्थानीय विकास मन्त्री हितराज पाण्डे र भूमी सुधार मन्त्री विक्रम पाण्डे, माओवादी केन्द्रका नेता नारायणकाजी श्रेष्ठ पनि सहभागी थिए ।