मङ्सिर २६, गोरखा । गोरखाको १६ ओटा विद्यालयमा खानेपानी आयोजना निर्माण कार्य सम्पन्न भएको छ । भूकम्पपछि देखिएको खानेपानी अभावको समस्या समाधानका लागि उक्त विद्यालयहरुमा खानेपानी आयोजना निर्माण गरिएको हो ।

भूकम्प प्रभावित गाविसका विद्यालयलाई लक्षित गरी युनिसेफ र उत्पीडित समुदाय विकास तथा अनुसन्धान केन्द्र (कोसडर) गोरखाको संयूक्त सहयोगमा खानेपानी आयोजनाहरुको निर्माण भएको हो । प्रति विद्यालयमा दुईलाख २५ हजार रूपैयाँको लागतमा खानेपानी आयोजना निर्माण गरिएको छ ।

त्यस्तै बाँकी ९ आयोजनाको निर्माण कार्य अन्तिम चरणमा पुगेको कोसडर गोरखाका कार्यक्रम संयोजक काजीराम रोकाले बताए  । १५ दिन भित्रै उक्त आयोजनाको निर्माण कार्य सम्पन्न हुने पनि उनले बताए । मुच्चोक गाविसको देवी चर्तुमाला प्रावि र ज्ञानज्योती प्रावि, बगुवा गाविसको दूधकन्या प्रावि र शिवज्योती प्रावि, भूम्लिचोक गाविसको शिलाभैरव प्रावि, मिरकोटको रत्न प्रावि, त्रिवेणी मावि, लप्सीचौर प्रावि, गाखँु गाविसको हिमाली मावि, हनुमान प्रावि, कृष्ण ज्योती प्रावि र नामु्रङ देवी प्राविमा खानेपानी आयोजना निर्माण गरिएको रोकाले जानकारी दिए । त्यस्तै मसेल गाविसको निवेल प्रावि, धुवाकोटको दुभार प्रावि, देउरालीको अकला प्रावि, राजदेवी प्रावि, महालक्ष्मी प्रावि, रामशाह निमावि, रामशाह मावि र नारेश्वरको बाल विकास प्राविमा पनि खानेपानी आयोजना निर्माण भएको बताइएको छ ।

फुजेलको बटुकी निमावि र अकला निमावि, घ्याल्चोकको ज्ञानमार्ग मावि र भिमोदय प्राविमा भने खानेपानी आयोजना सँगै शौचालय भवन निर्माण भएको रोकाको भनाइ छ । अकला निमावि फुजेलमा रू. ११ लाख १६ हजार ७ सय, बटुकी निमावि फुजेलमा रू. ८ लाख ३० हजार, भिमोदय प्रावि घ्याल्चोकमा रू. ६ लाख ७२ हजार र ज्ञानमार्ग माविमा रू. १३ लाख ७३ हजार ६ सयको लागतमा शौचालय सँगै खानेपानी आयोजना निर्माण भएको बताइएको छ । भूकम्प पश्चात शिक्षा कार्यालय सँग समन्वय गरी कार्यालयले सिफारिश गरेका विद्यालयमा आयोजना निर्माण गरिएको हो । विद्यालयमा खानेपानी आयोजना र शौचालय निर्माण भएसँगै सरसफाइमा पनि सहयोग पुगेको विद्यालयले बताएको छ ।

abhiyan