भाद्र १३, २०७३- रोजगारीका लागि साउदी गएका एक नेपाली युवक आफूले पाएको ५ वर्षको जेल सजाय भुक्तान गरेको ७ मिहना बितिसक्दा पनि हालसम्म छुटेका छैनन् । उनलाई छुटाइदिन परिवारले सरकारसँग आग्रह गरेको छ। एक पाकिस्तानी नागरिकको हत्या अभियोगमा गोरखा, केराबारी ७ छारनासका ध्रुव गुरुङ जेल परेका हुन् ।

साउदीस्थित उनका साथी गणेश मिभक लिम्बूका अनुसार धु्रव साउदीस्थित जुबैलको अबुहदरिया सेन्ट्रल जेलमा छन् । पति जेलमा परेपछि पत्नी काशी विक्षिप्त बनेर हिँडेकी छन्।

‘५ वर्ष भयो, उहाँको स्थिति के कस्तो छ, थाहा छैन,’ बुधबार बेंसीसहर आएकी उनले भनिन्, ‘एक/एक वर्षमा छुट्टीमा आउँछु भनेका मान्छे ७ वर्ष हुन लाग्यो, अत्तोपत्तो छैन।’

पछिल्लो समय माघमा फोनमा छोटो समय बोल्न पाएको उनले बताइन्। ‘छिटै फर्केर आउँछु मात्रै भन्नुभयो। त्यसपछि सम्पर्क छैन,’ उनले भनिन्। डेढ घण्टाको दूरीमा माइती र घर भएकी काशीले ध्रुवसँग प्रेमविवाह गरेकी हुन्। छोरा जन्मेको ३ महिनामा पहिलोपटक २०६५ वैशाखमा साउदी गएका धु्रव २ वर्ष बसेर ४५ दिने छुट्टीमा आएका थिए। ०६६ को अन्तिमतिर साउदी फर्केका उनी त्यसयता फर्केर नआएको पत्नीले बताइन्। ‘न फोनमा राम्रोसँग बोल्न पाइन्छ, कस्तो अवस्था छ, थाहै छैन,’ उनले भनिन्।

काशीले सासूससुरा बेलायतमा रहेको बताइन्। उनी अहिले तनहुँको डुम्रे बस्दै आएकी छन्। छोरा साजन काठमाडौंमा फुपूहरूको साथमा बसेर ३ कक्षामा पढ्छन्। काशीले घटनाबारे त्यति धेरै जानकारी नभएको बताइन्। ‘तरकारी काट्ने समयमा पाकिस्तानी आएर आक्रमण गरेछ। त्यसपछि झगडा हुँदा आफू जोगिन खोज्दा पाकिस्तानीको मुत्यु भएको सुनें,’ उनले भनिन्, ‘सबै कुरा सोध्नु पनि कसरी। आफ्नो गल्ती छैन भन्नुहुन्छ।’

उनले आफ्नो पतिको अवस्थाबारे जानकारी लिन खोजे पनि कसैले चासो नदिएको र भन्न नखोजेको बताइन्। ‘डुम्रे आएपछि फेसबुक खोलें। उहाँको फेसबुकमा रिक्वेस्ट पठाएँ। एसेप्ट भएन। धेरैपटक म्यासेज गरेपछि फोन नम्बर माग्नुभयो। दिएपछि उहाँले फोन गर्नुभयो,’ उनले भनिन्, ‘नआत्तिकन बस्न भन्नुभयो। २/३ महिनामा एक पटक छोटो समयका लागि फोन हुन्थ्यो। आफैं काटिन्थ्यो। अहिले त त्यो पनि हुन छाड्यो।’

७ महिना बढी कैद         
साउदीस्थित अदालतले धु्रवलाई ५ वर्षको जेल साजय सुनाएको थियो। २०१० फेबु्रअरी १ तारिखका दिन कारागार चलान भएका उनी ५ वर्ष पूरा भइसक्दा पनि छुट्न सकेका छैनन्। गत जनवरीको अन्तिममै जेलमुक्त हुनुपर्ने उनी अहिलेसम्म जेलमुक्त नभएका हुन्।