फाइल तस्बिर
काठमाडौँ : अब बहुमतीय सरकार गठनका लागि प्रकिया अघि बढाउन राष्ट्रपति विद्यादेवी भण्डारीले सभामुखलाई पत्र पठाएकी छिन्।
सहमतीय सरकार गठनका लागि दिएको एक साताको समयसीमा आइतबार सकिएपछि सोमबार मध्यान्ह राष्ट्रपतिले बहुमतीय सरकार गठनका लागि प्रक्रिया थाल्न पत्र पठाएकी हुन्। राष्ट्रपति कार्यलयबाट पत्र प्राप्त भएको र सभामुखले अब प्रधानमन्त्री निर्वाचनका लागि प्रकिया अघि बढाउने संसद्का प्रेस सल्लाहकार बबिन शर्माले बताए । सोमबार अपरान्ह बस्ने संसद्को बैठकमा बहुमतीय सरकार गठनका लागि राष्ट्रपतिबाट प्राप्त पत्रको जानकारी दिने र आजै प्रधानमन्त्री निर्वाचनको कार्यक्रम प्रकाशन गर्ने तयारी संसद् सचिचालयको छ।
संसद् सचिवालयका महासचिव मनोहरप्रसाद भट्टराईलाई निर्वाचन अधिकृत तोकिनेछन्। मंगलबार उम्मेदवारी दर्तालगायतका प्रकिया हुनेछन् भने बुधबार प्रधानमन्त्रीका लागि विभाजन प्रकियाबाट मतदान हुनेछ। बुधबार नै माओवादी केन्द्रका अध्यक्ष पुष्पकमल दाहाल प्रचण्ड दोस्रोपटक प्रधानमन्त्री बन्नेछन्।
व्यवस्थापिका–संसद्को बैठक सोमबार अपरान्ह तीन बजे राखिएको छ । पहिलो बैठकमा संसद्का पूर्वसदस्य हरीराज खेवाको शोक प्रस्ताव र दोस्रो बैठकमा प्रधानमन्त्रीको निर्वाचन कार्यक्रम तय हुने छ।
राष्ट्रपति डा यादवले साउन १० गते सहमतिको सरकार गठन गर्नका लागि एक साताको समय दिएकी थिइन्। दलहरुबीच सहमतीय सरकारका लागि कुनै सार्थक सम्वाद भएको छैन। राष्ट्रपतिको आव्हानलाई सम्मान गर्न दलहरुले औपचारिकता मात्रै निर्वाह गरेका थिए।
नेपाली काँग्रेस, नेकपा (माओवादी केन्द्र) लगायतका दलले माओवादी केन्द्रका अध्यक्ष पुष्पकमल दाहाललाई प्रधानमन्त्रीको उम्मेदवार बनाउने तयारी गरिरहेका छन् । नेकपा (एमाले) ले भने कसलाई उम्मेदवार बनाउने भन्नेबारेमा हालसम्म कुनै निर्णय गरिसकेको छैन ।
कांग्रेस र माओवादी केन्द्रले २५३ सांसदको हस्ताक्षरसहित गत असार २९ गते संसद्मा अविश्वास प्रस्ताव दर्ता गराएका थिए। तर अविश्वास प्रस्ताव निर्णयार्थ पेस हुनुअघि नै ओलीले राजीनामा दिएपछि मतदान स्थगित भएको थियो।
संसदमा कायम रहेको सांसद संख्याको बहुमत अर्थात २ सय ९८ जना सांसदको समर्थनमा प्रधानमन्त्री निर्वाचित हुनसक्ने अवस्था छ। कांग्रेस, माओवादी, मधेसी मोर्चासहितको गठबन्धन, राप्रपा तथा अन्यसमेत गरी तीन सय पचासभन्दा बढी संख्या नयाँ समिकरणको पक्षमा देखिएको छ।
annapurnapost
