कैलासबावु श्रेष्ठ/गोरखा
चैत्र २५ गते । बाँदरको बिषयमा धेरै उखान मध्ये ‘बाँदरले आफ्नो घर पनि बनाउदैन र अरुको घर पनि बन्न दिदैन’ यस्तै कहानी तथा सत्यता संग मिल्छ गोरखाको फुजेलमा ।
२ बर्ष भयो फुजेलको केही गाउँहरुमा बाँदरले आतंकै मच्चाउन थालेको छ । त्यो पनि मानिस माथि । प्राय जंगली जनावर मानिस देख्नासाथै डराउछ तर फुजेलमा रहेको बाँदर भने अरु देखेर डराए पनि मानिस देखेर डराउन भने जानेको छैन ।
गएको २ वर्षमा मात्रै त्यो क्षेत्रमा रहेको बाँदरले १० देखी १२ जनालाई टोकेर आतंक नै मच्चाई सकेको फुजेल गाउँ बिकास समिति ५ न्यौपाने गाउँका ५६ बर्षिय ढिल्लीराम भट्टराईले बताए ।
बाँदरले फुजेलको न्यौपाने गाउँ, तिवारी गाउँ, माझी गाउँ, बेलखर्क गाउँ, दबक र गुडपन्तरी गाउँमा रहेका सर्ब साधारणहरुलाई बढी सताएको छ । घरमा मानिस होस वा नहोस बाँदरलाई केही खान मन लाग्यो भने हुल बाधेर आउछ र घरमा पस्छ अनि भएका खानेकुरा खान्छ र केही लिएर पनि जाने गरेको फुजेल गाबिस ५ दवकका ७२ बर्षिय कुल प्रसान पन्तले बताए ।
सो क्षेत्रमा अहिले पनि स्कुले बिद्यार्थीका साथै बृद्व र जंगल जाने जो कोहीलाई पनि बाँदरले टोक्ने, गालामा थप्पड हान्ने गरेको स्थानिय बताउछन । स्कुले बिद्यार्थी एक्लै भए स्कुल नै नजाने, जंगल तथा गाई बस्तु चराउन समूहमा जाने ति गाउँको सामान्य दिनचार्य जस्तै भै सकेको छ ।
बाँदर गाउँ आएको थाहा पाउने बित्तीकै स्थानियहरु झयाल, ढोका लगाएर घर भित्र बस्ने गरेको फुजेल ४ का रामचन्द्र दुवाडीले बताए । दुवाडीका अनुसार घरमा भित्र रहेको चुल्होको धुवा फाल्न प्रयोग गरेको चिम्नी बाट समेत बाँदर घर भित्र पसेर उपद्रो मच्चाउने गरेको बताए ।
बाँदरको टोकाई पछिको उपचार महागों भएका कारण फुजेल बासीले बाँदर नियँन्त्रणका लागि सरकारलाई पहल गरीदिन आग्रह समेत गरेका छन । बारीको अन्नपात र घर भित्राएको खाद्यान्न त खान पाउला नपाउला तर मानिसलाई नै टोके पछि लाख भन्दा कम रकम खर्च गरेर उपचार हुदैन त्यसै कारण पनि समास्या समाधानमा सरकारी चासो हुन आवश्यक रहेको फुजेलबासीको भनाई रहेको छ ।
अहिले पनि ति गाउँका सर्व साधारण बाँदर बाट सहज रुपमा बच्नका लागि हातमा गुलेली लिएर हिड्नका साथै समूहमा हिड्ने गर्दछन ।
उत्त क्षेत्रमा पाईने बाँदर अन्य क्षेत्रको भन्दा आक्रमक र ठुलो भएका कारण पनि बाँदर देखी सर्व साधारण त्रसित भएका हुन ।
यता सरोकार राख्ने जिल्ला बन कार्यालय गोरखाका बन अधिकृत जिबनाथ पौडेलका अनुसार अहिले सम्म पनि उत्त क्षेत्रमा बाँदरको आतंकका बिषयमा कुनै पनि जानकारी प्राप्त नभएको बताउछन । तर पनि फुजेलको बाँदर आतंकका बिषयमा जानकारी लिने र के गर्न सकिन्छ तत्कालै काम थाल्ने पौडेलले बताए ।
