फाल्गुन २७, २०७२- उपप्रधान, सहकारी तथा गरिवी निवारण मन्त्री चित्रबहादुर केसीले संघीयता रहेसम्म मुलुकको राष्ट्रियता, सार्वभौमिकता र अखण्डता अप्ठेरोमा पर्ने बताएका छन् । यतिबेला देशमा संघियताको दुष्परिणाम देखिन थालेको भन्दै उनले संविधानका सकारात्मक पक्षको कार्यान्वयन गर्दै संघीयताजस्ता विषयमा पुनर्बिचार गर्नुपर्नेमा जोड दिए ।

‘कुनै पनि प्रणाली र नीति राष्ट्र र जनताको हीतमा छ छैन भन्ने पहिला हेर्नुपर्छ,’ जिविस कास्कीको २४ औं परिषद्को विहीबार उद्घाटन गर्दै मन्त्री केसीले भने, ‘यतिबेला संघीयता सबै नेपालीलाई बिझाएको छ । संघीयता खारेज नभए मुलुक सिक्किम र भुटान हुने डर छ ।’ उनले संघीयताबिरुद्ध संसदमा संविधान संसोधन प्रस्ताव पेस गर्न सकिने बताए । हिमाल पहाड र तराई मिलेर बनेको नेपाललाई अहिले संघीयताको नाममा तराईलाई अलग्याउने खेल भइरहेको उनले दावी गरे ।

ठूला दलहरु मिलेर संविधान जारी गरेका र सरकारमै बसेर कार्यान्वयन गर्ने सहमति भए पनि सहमतिबाट कांग्रेस पछाडि हटेको उनको भनाई थियो । कांग्रेसले छाडेकाले आफु उपप्रधानमन्त्री हुन पाएको र सरकारमा जाँदैमा संघीयतालाई नस्विकारेको उनले बताए । एउटा देशसंग मात्रै व्यापारिक कारोवार हुँदा अहिलेको समस्या आएको भन्दै उनले अव चीनसंगका नाका खोलेर व्यापार पनि बढाउनु पर्नेमा जोड दिए ।