फोटो :जिल्ला प्रहरी कार्यालय अगाडी प्रर्दशन गर्दै एमाओवादीका नेता कार्यकर्ता । तस्बिर: मनिका झा
जनकपुरधामः जिल्ला वन कार्यालय धनुषाका प्रमुख वीरेन्द्र साहमाथि हातपात गरेको आरोपमा प्रहरीले एमाओवादीका युवा नेता देवसागर दासलाई पक्राउ गरेको छ ।
साहलाई सोमबार राति प्रहरीले पक्राउ गरेपछि रिहाईको माग गर्दै मंगलबार एमाओवादी सांसद राम सिंह यादवको नेतृत्वमा नेता कार्यकर्ताले जिल्ला प्रहरी कार्यालय धनुषा घेराउ गरि नाराबाजी गर्दै टायर बालेर विरोध प्रर्दशन गरेका थिए ।
आइतबार माओवादी कार्यकर्तासँग दाउरा सिफारिसको लागि घूस मागेको भन्दै वन प्रमुख साहलाई उनको कार्यकक्षमै पुगेर सांसद रामसिंह यादव, एमाओवादीका केन्द्रिय सदस्य रामचन्द्र मण्डल र देवसागर दाससहितका नेता कार्यकर्ताले हातपात गरि उनको ल्यापटप र मोबाइल फोन तोडफोड गरेका थिए ।
आमाको मृत्युपछि काजक्रियाको लागि धनुषाको भुतही पटेर्वाका एमाओवादी कार्यकर्ता पशुपति ठाकुर वन कार्यालय दाउरा उपलब्ध गराईदिन सिफारिश गराउन पुगेका थिए ।
एमाओवादीको सिफारिसमा दाउरा उपलब्ध गराईदिन मांग गरेका ठाकुरलाई प्रमुख साहले आफुहरुले दाउरा उपलब्ध गराउन नसक्ने भन्दै फर्काएका थिए ।
तर, एमाओवादीका सांसद यादवले ठाकुरलाई दाउराको सिफारिस गराउन छ भने केही खर्चबर्च गर्नुस् भनेर घुस मागेपछि आफुहरु आक्रोशित भएको र उनलाई सम्झाउने प्रयास गर्दा सामान्य चर्काचर्की मात्र भएको बताए ।
सो कुरालाई लिएर आफ्ना नेतालाई पक्राउ गर्नु उचित नरहेको भन्दै पक्राउ परेका दासलाई यथाशिघ्र रिहा नगरिए कडा आन्दोलन गर्ने एमाओवादीका नेताहरुले धम्की समेत दिएका छन् ।
यता, हातपातबाट घाइते भएका वन प्रमुख साहले आफुलाई एमाओवादीका नेता रामचन्द्र मण्डलले कानुन मिचेर दाउराको सिफारिश गर्न दबाव दिएको र त्यसो गर्न नमानेपछि हातपात गरेको बताएका छन् ।
निःशुल्क दाउरा उपलब्ध गराउने आफुहरुसँग कुनै आधार नरहेको उनले बताए । धार्मिक प्रयोजनका लागि संघसंस्थाहरुले दाउरा मागेमा आफूले सागरनाथ वन विकास परियोजनालाई सिफारिस गर्ने गरेकोमा एमाओवादी नेताहरुले आफुलाई दबाव दिएको साहले बताए ।
कार्यालयमा आएर एमाओवादीका नेताहरुले आफ्नो गृहमन्त्री हुँदाहँुदै सामान्य दाउरा सिफारिसमा तैले आनाकानी गर्ने भन्दै कुटपिट गरेको उनले बताए । उनले आफूमाथि यस्तो दुव्र्यवहार गर्नेलाई कारबाही होस् भन्ने आफ्नो चाहना रहेको साहको भनाइ छ ।
annapurnapost
