फाल्गुन २५, २०७२- सामान्यतयाः दुई फरक मत वा फरक विचार र पहिचान भएका समूहका बीच एकताको कुरा गर्दा ‘एक हौं’ भन्ने नारा लाग्ने गर्छ । तर, आज (मंगलबार) कांग्रेसको महामन्त्री र कोषाध्यक्षको मतगणना चलिरहेका बेला कांग्रेस केन्द्रीय कार्यालय सानेपामा भने अनौठो नारा लाग्यो- कांग्रेस-कांग्रेस एक हौं !
यो नारा अनौठो किन थियो भने, यसमा आफ्नै पार्टीलाई एक हौं भनिएको थियो, जसका बीच विचार, मान्यता र पहिचानमा कुनै फरक छैन । यो नारा यत्तिकै भने लागेको थिएन । यसले पार्टीभित्र रहेको दुई गुटबीचको एकताको कुरा गरेको थियो ।

संस्थापन र देउवा दुई प्यानलमा विभाजित भएर चुनावमा उत्रिएका कांग्रेस कार्यकर्ताका लागि सभापतिमा देउवा र महामन्त्री तथा कोषाध्यक्षमा ‘संस्थपान’का सशांक कोइराला र सितादेवी यादवको विजय दुई गुटबीच ‘एकता’को सन्देश थियो ।

महामन्त्रीको मत गणना अन्तिमतिर जाँदै गर्दा जब सशांकले निकटतम प्रतिद्वन्द्वी अर्जुननरसिंह केसीमाथि स्पष्ट अग्रता कायम गरे, तब कार्यकर्ताहरुले नाराबाजी थालेका थिए । ‘बीपी पुत्र सशांक दाई- हाई हाई’का नाराका बीच नै नारा फलाक्नेले ‘कांग्रेस-कांग्रेस एक हौं’को नारा लगाएका थिए । तर, यो एक हौंको नारा सुन्नका लागि सशांक भने केन्द्रीय कार्यालयमा उपस्थित थिएनन् ।

चित्रलेखा यादवलाई ८ मतले पराजित गरेर बाहिर निस्किएपछि सितादेवी यादवले आफ्नो जितलाई ‘सहिदको सम्मान’ बताइन् । सिरहा जिल्ला विकासका उपसभापति रहेका बेला उनका पति चन्द्रनारायण यादवको माओवादीले हत्या गरेका थिए ।

नेपाली कांग्रेेसको पहिलो महिला जिल्ला सभापतिका रुपमा काम गरेकी सितादेवीलाई सुरुमा कमजोर उम्मेदवार ठानिएको थियो । उपसभामुख र मन्त्री भइसकेकी बहालवाला कोषाध्यक्ष चित्रलेखाको व्यक्तित्व र चर्चा ठूलो थियो । तर, मतमा श्वेतवस्त्रधारीणी सितादेवी अग्ली भइन् ।

अचम्भित चित्रलेखा, चिन्तित जगदीशनरसिंह
मतगणना चलिरहेका बेला कार्यालयमा चित्रलेखा यादव र जगदीश्वरनरसिंह केसी कुरा गरिरहेका थिए । ८-१० मतले सितादेवीसँग तलमाथि चलिरहेका बेला उनी अचम्भित देखिन्थिन् । ‘यस्तो कम्पिटिसन होला भन्ने त मैले सोचेकै थिइनँ,’ उनले भनिन् । मत गणना भइरहेका दुई तलामा उनी तलमाथि गरिरहेकी थिइन् ।

महामन्त्री उम्मेदवार अर्जुननसिंह केसीका भाई तथा कांग्रेस नेता जगदीशनरसिंह केसी भने उदास देखिन्थे । सुरुदेखि नै सशांकको अग्रता गतिलो भएको देखेर उनी भन्दै थिए- ‘भोट क्रस भयो, हाम्रो धेरै भोट क्रस भयो ।’

उनले भनेजस्तो भोट क्रस भएको देखियो पनि । देउवा प्यानलबाट पदाधिकारीमा सबैभन्दा कम भोट अर्जुननसिंहले नै पाए । कोषाध्यक्ष उम्मेदवार चित्रलेखाले पाएको भन्दा उनले करीब २ सय मत अर्जुनले कम पाए । चित्रलेखाले १२०९ मत पाउँदा अर्जुनले १०१७ मात्र पाए । कोषाध्यक्षमा जम्मा ८ मतको फरक रहँदा महामन्त्रीमा भने ४ सय मतको फरक पर्‍यो ।

सिटौला प्यानलको ‘ईज्जत’
यो महाधिवेशनको तेस्रो प्यानल सिटौला प्यानलले पदाधिकारीमा भने सिटौलाले भन्दा बढी मत पाए । महामन्त्री उम्मेदवार गगन थापाले ५ सय ८४ मत पाए भने कोषाध्यक्ष उम्मेदवार उमाकान्त चौधरीले ४ सय ५७ मत ल्याए ।

यो प्यानलको मतलाई ‘ईज्जत’सँग जोडिएको थियो । अघिल्लो महाधिवेशनमा सर्वाधीक लोकपि्रय मत पाएका गगनले यसपालि फड्को मारेर महामन्त्रीमा उम्मेदवारी दिँदा कति मत पाउँलान् भन्ने चासो धेरैलाई थियो । कतिले उनले सिटौलाकै हाराहारी मत ल्याउने अनुमान गरेका थिए भने कतिले उनले ८ सयको हाराहारी मत ल्याउने दावी गरेका थिए । दावी सिटौलाको पनि दोस्राे हुने थियो । तर, यो प्यानका कोही पनि मतमा दोस्रो भएनन् । र, यो प्यानल ‘तेस्रो प्यानल’ नै बनेर रह्यो ।

अर्जुननरसिंह र गगन थापा ‘ज्वाईं-ससुरा’ को मत जोड्दा सशांकको भन्दा बढी हुन्छ । एकैजना मात्रै उम्मेदवार हुँदा हिसाब अर्कै हुन्थ्यो होला तर गगनले धेरै मत काटेकाले अर्जुननरसिंह हारेको विश्लेषण गर्ने ठाउँ चाहिँ रह्यो, जसरी सिटौलाको उम्मेदवारीले सभापतिमा रामचन्द्र पौडेललाई पराजित गर्न भूमिका खेल्यो ।

गगनमाथि अर्को पनि एउटा आरोप थियो- सशांकको मत काटेर ससुरालाई जिताउन गगन उठेका हुन् । तर, परिणामले त्यो कुरालाई सही सावित गरेन ।