फोटो :अन्नपूर्ण ग्राफिक्स
काठमाडौं: नेपाली कांग्रेसको १३ औं महाधिवेशनबाट नयाँ महामन्त्री र कोषाध्यक्ष चयनका लागि मतगणना सानेपास्थित मूख्यालयमा शुरु हुँदैछ ।
आइतबार भएको मतदानपछि महामन्त्री र कोषाध्यक्षको मतगणना मंगलबार दिउँसोबाट हुन लागेको हो ।
कांग्रेसको महाधिवेशनमा सभापतिमा भन्दा महामन्त्रीको भिडन्तमा तीन प्रतिस्पर्धी उत्रिएकाले यसलाई विशेषरुपमा हेरिएको छ ।
महामन्त्रीमा चर्चित युवा नेत गगनकुमार थापा, उनका ससुरा कांग्रेसका पुराना नेता अर्जुननरसिंह केसी र कोइराला परिवारको विरासत थेग्ने चुनौती बोकेका शशांक कोइरालाले प्रतिस्पर्धा गरिरहेका छन् ।
गगनलाई युवा पुस्ताको भावी नेतृत्वमा हेरिएको छ भने उनका ससुरा अर्जुननरसिंहलाई सभापतिमा निर्वाचित देउवाको प्रतिष्ठासँग जोडेर हेरिएको छ ।
अर्कातिर तत्कालीन सभापति सुशील कोइरालाको निधन भएपछि २००७ सालदेखिको कोइराला परिवारको विरासत थेग्ने जिम्मेवारी शशांकको काँधमा छ । आजै कोषाध्यक्षको पनि मतगणना हुँदैछ ।
कोषाध्यक्षका लागि देउवा प्यानलबाट वर्तमान कोषाध्यक्ष चित्रालेखा यादव, पौडेल प्यानलबाट सीतादेवी यादव, सिटौला प्यानलबाट उमाकान्त चौधरी र स्वतन्त्र उम्मेदवारी दिएका कृष्ण कार्कीबीच प्रतिस्पर्धा भएको छ ।
दिउँसो साढे दुई बजेसम्म मतणनाका लागि प्रतिनिधिहरुको छनोट भइसकेपछि केहीबेरअघिबाट मतगणना शुरु भएको हो ।
annapurnapost
