फोटो :सिरहाको धनगढीमाई नपा १३ भर्लेनीका अग्निपीडीत त्रिपालमुनि खाजा खाँदै ।
रामबाबु यादब
रामबाबु यादब
सिरहा: सप्तरी, ओखलढुंगा, मोरङ र सिरहामा भएका आगलागीबाट ठूलो धनजनको क्षति भएको छ ।
सप्तरी फर्सेट ६ बस्ने रामसेवक खङको पूजाकोठाको दियोबाट आइतबार साँझ अचानक आगालागी हुँदा सोही स्थान बस्ने कुजिलाल खङ, सन्तोष खङ, राम खङ, रामसेवक खङलगायतको ४ वटा फुसको घर, बौवालाल यादव र श्रीलाल यादवको ग्वाली, घर र सम्पूर्ण धनमाल जलेर क्षति भएको पूर्व क्षेत्रीय प्रहरी कार्यालय विराटनगरले जनाएको छ । दमकल, नेपाल प्रहरी, सशस्त्र प्रहरी, नेपाली सेना र स्थानीयवासीको सहयोगमा आगो नियन्त्रणमा लिइएको थियो ।
ओखलढुंगा सिसनेरी गाविस २ मा अचानक आगलागी हुँदा १२ लाख ६९ हजारबराबरको क्षति भएको प्रहरीले जनाएको छ । स्थानीय विष्णुमाया थापा मगरको फुसको छानो भएको २ तल्ले घर, अन्नपातर लत्ताकपडा गरी ५ लाख १९ हजारबराबरको क्षति भएको प्रहरीले जनाएको छ ।
छिमेकी डम्बरबहादुर मगरको फुसको छानो भएको २ तल्ले घर, गाईगोठ, सुन, चाँदी, अन्नपात लत्ताकपडा जलेर नष्ट हुँदा अन्दाजी ७ लाख ५० हजारको क्षति भएको जिल्ला प्रहरी कार्यालय ओखलढुंगाले जनाएको छ ।
विराटनगरको ट्राफिक चोकस्थित सुनीलकुमार हलुवाईको चारतले पक्की घरको भुर्इं तलामा निशा कर्णले सञ्चालन गरेको बेकरीमा रहेको इन्भर्टर पड्किएर आगलागी हुँदा कम्प्युटर, केही बेकरी सामान तथा काठका झ्याल जलेर नष्ट भएको छ ।
गत सता सिरहाको धनगढीमाई नपा १३ भर्लेनीमा आगलागी भएको थियो । आगलागीबाट २५ परिवारको ४२ घर टहरा जल्दा ५० लाखभन्दा बढीको धनमाल जलेर नष्ट भएको छ ।
स्थानी मनिकलाल यादवको घरबाट सुरु भएको आगो केहीबेरमै पूरैगाउँमा फैलिएको स्थानीय मनिया यादवले बताए । यादवका अनुसार वर्तका लागि घरमा खिर पकाईरहेका बेला चुलोबाट आगो लागेको हो । बिहानैदेखि तेज हावा चलेका कारण गाउँभरि आगो फैलिएको यादवले बताए ।
आगलागीबाट घरमा रहेको अन्नपालत, लत्ताकपडा पूर्ण रूपमा जलेको पीडितले बताएका छन् । आगो स्थानीय बासिन्दा, जनपथ, सशस्त्र प्रहरी, नेपाली सेना र लहान नगरपालिकाको बारुण यन्त्रले नियन्त्रण लिएको थियो ।
उनका अनुसार २५ परिवारका ४२ घर जलेर नष्ट भएको छ । जसमध्ये १२ परिवारको बस्ने ठाउँसमेत नभएको प्रहरीले जनाएको छ । अग्निपीडितले अहिले आफूहरूलाई खाद्य सामग्री, पकाउने भाडा र लत्ताकपडाभन्दा बस्ने घरको आवश्यक रहेको बताए ।
आगलागीपीडित भन्छन् ‘चर्को घाम, हावा हुरीले हाम्रो जीवन कष्टकर बनिरहेको छ, हामीलाई खाद्यान्न, भाँडा र लत्ताकपडा भन्दा बासको आवश्यकता छ । हामीलाई राहत दिन चाहने र सरकारसँग बासको तुरुन्त व्यवस्था मिलाउन अग्रह गर्छौं ।’
गाउँ नै सखाप हुने गरी भएको ठूलो विपद्मा सरकारले केही सहयोग नगरेको अग्निपीडित गुनासो गरे । उनीहरू भन्छन्, ‘गाउँ नै सकियो, गाउँमा कसैले कसैलाई सहयोग गर्न सक्ने अवस्था छैन, बाहिरबाट आएका केही सहयोगीले दिएको खाद्यान्न राहतबाट छाक टरिरहेको छ, सरकारका तर्फबाट हामीलाई केही सहयोग नै मिलेको छैन । हामीलाई सरकारले तुरुन्त बासका लागि मात्र भए पनि एउटा घर निर्माणको सामग्री उपलब्ध गराइदिनु पर्छ ।’
annapurnapost