छेटु शेर्पा
फोटो :किमाथांका–विराटनगर (कोसी) राजमार्ग निर्माणका क्रममा किमाथांका बिरालोभीरमा एक सय ७० रुपैयाँमा इन्धन खरिद गरी ल्याइँदै ।
खाँदबारी: प्रतिलिटर १ सय ७० रुपैयाँका दरले कालोबजारीमा इन्धन किनेर किमाथांका–विराटनगर जोड्ने कोसी राजमार्ग निर्माण हुँदै आएको छ । नेपालतर्फ सडक नभएपछि चिनियाँ बजारबाट इन्धन खरिद गरी निर्माण भइरहेको हो । राष्ट्रिय गौरवको सडक भएकाले निर्माण तीव्र पार्न किमाथांकाबाट २१ किलोमिटर सडक निर्माण सुरु भएको छ ।
खाँदबारीबाट किमाथांकासम्म सडक नजोडिएकाले इन्धन ढुँवानी गर्न सकिँदैन । ठेक्का सम्भौतामा सरकारले पराराष्ट्र मामिलाबाटै सडक निर्माणमा आवश्यक इन्धन तातोपानी–सिगात्से हुँदै ढुवाँनी गर्न अनुमति दिलाउने भने पनि स्वीकृति नदिएकाले ब्ल्याकमा इन्धन खरिद गर्न बाध्य भएको निर्माण कम्पनी शर्मा एपेक्स कान्छाराम जेभीका साइड इन्चार्ज भरत कार्कीले बताए ।
उनले चिनियाँ व्यापारीसँग अनुरोध गरेर ब्ल्याकमा चिनियाँ रकम १० फेगुर तिरेर चाँगासम्म इन्धन ल्याइदिने गरेको बताए ।‘थप ढुवानीसहित एक सय ७० रुपैयाँ तिरेर सडक निर्माण गर्दैछौं । जिम्मेवारी बहन राज्य गरेन’, उनले गुनासो पोखे ।
प्रधानमन्त्री खड्गप्रसाद ओलीले दुई वर्षभित्र किमाथांकामा दुई लेनको सडक निर्माण गरिसक्ने बताएका छन् । निर्माण कम्पनीले राष्ट्रिय गौरवसँग जोडिएको राजमार्ग भनेर काम गरे पनि सरकारले थप सहयोग नगरेको उनले बताए । हालसम्म किमाथांकाबाट तल बिरालोभीरसम्मको १० किलोमिटर कच्ची सडक निर्माण सम्पन्न भइसकेको छ ।
डिजेल भनेको समयमा नपाइने, चिनियाँ व्यपारीसँग बढी अनुरोध गर्नुपर्ने, अन्यलाई खरिद गर्न नदिने समस्याले कामदार र एस्काभेटर बिनाकाम बस्ने गरेको निर्माण कम्पनीले जनायो । खाँदबारीमाथि भने एकुवासम्म मात्र सडक पुगेको छ । यहाँबाट इन्धन ढुवानी गर्न सम्भव नभएको कार्कीले बताए ।
सरकारले चीनको बाटो हुँदै इन्धन र अत्यावश्यक सामग्री ल्याउन पहल नगरी दिँदा तोकिएकै समयमा काम पूरा नहुने भएको छ । किमाथांकाका नागरिक अगुवा तेन्छेबी शेर्पाले तत्काल सडक निर्माणमा विकल्पका साथ सरकारले पहल गर्नुपर्ने माग गरे ।
annapurnapost