फाल्गुन २, २०७२- नेदरल्याण्डका नागरिक गोरारले बर्दिया राष्ट्रीय निकुन्जको बघौरा फाँटामा बाघको घेरामा परेपछि दुई घण्टासम्म रुख माथि चढेर ज्यान बचाएका छन् । निकुन्जका अनुसार दुई घण्टासम्म रुख मुनी बसेका बाघ आक्रमक रहेकाले उनि त्रासमा रहेका थिए ।

उनलाई दुई घण्टापछि निकुन्जका माहुतेले हात्तीको सहयोगमा उद्दार गरेको प्रमुख संरक्षण अधिकृत रमेशकुमार थापाले बताए । बर्दिया निकुन्ज अवलोकन गर्न गएका गोरारसहित पथ प्रदर्शक कृष्ण शाह, बर्दिया टाईगर रिर्सोटका सञ्चालक रामजी थापा र उमंग खड्कासहित चारजनाको टोली बघौरा फाँटा पुग्दा बाघले एक्कासी आक्रमण गरेको थियो ।

आक्रमणमा परेपछि सबै ज्यान जोगाएर भाग्दा गोरार भने रुखमा चढेका थिए । पथ प्रदर्शकले नेदरल्याण्डका नागरिक गोरारलाई फोन मार्फत खोजी गर्दा आँफू रुखमा चढेको बताएका थिए । उनलाई खोज्ने क्रममा बाघको आक्रमणमा परि पथ प्रदर्शक शाह घाइते भएकाछन् ।

‘लठ्ठीले भुँइमा हान्दै, हो–हल्ला गरपछि बाघ भागेको थियो,’ अधिकृत थापाले बताए । बाघ भागे लगतै उद्दार गर्न गएकाहरु माथि दुई डमरुसहित बाघले पुन आक्रमण गर्दा अन्य पनि ज्यान जोगाउन रुखमा चढेका थिए ।

निकुन्जबाट गएको हात्तीको सहयोगमा सबैलाई उद्दार गरिएको छ । बाघले डमरु माथि आक्रमण हुन लागेको भन्दै आक्रमण गरेको हुन सक्ने आशंका निकुन्जको कर्मचारीको छ ।

घाइते शाहलाई उपचार्थ कोहलपुरस्थित शिक्षण अस्पताल लगिएको छ । उनको अवस्था सामान्य रहेको बर्दिया निकुन्जले जनाएको छ । पथ प्रदर्शक शाहलाई बाघको पञ्जाबाट भएको आक्रमणमा हात र खुट्टामा चोट लागेको छ । बर्दिया निकुन्जको उक्त फाँट बाघको बासस्थान मानिन्छ । घना जंगल र चित्तल प्रशस्त पाइने भएकाले पनि त्यहाँ बाघको संख्या उल्लेखनिय भएकाले पनि पर्यटकहरु त्यहाँ जाने गर्छन् ।

माघ ३ गते देखि बाघ गणना भइरहेको समयमा पर्यटक माथि आक्रमण भएको पहिलो घटना हो । तीन वर्ष अघि भएको गणना अनुसार ५० बढी बाघ रहेको निकुन्जमा यस वर्ष ७० पुग्ने अनुमान निकुन्जका कर्मचारीको रहेको छ ।