फोटो :नेपाली कांग्रेसका सभापति एवम् पूर्व प्रधानमन्त्री सुशील कोइरालाको पशुपति आर्यघाटमा अन्तिम संस्कार गरिँदै । तस्बिर: दिनेशविक्रम शाह
काठमाडौं : पाली कांग्रेसका सभापति तथा पूर्वप्रधानमन्त्री सुशील कोइरालाको राजकीय सम्मानसाथ अन्तिम संस्कार गरिएको छ । दिउँसो २ बजे दशरथ रंगशालाबाट शुरु शवयात्रा ४ बजे पशुपति आर्यघाटमा पुगेपछि उनको साँझ पौने छ मा उनको पार्थिव शरीरमा दागबत्ती दिइएको हो ।
ठाइँला भाइ अशोक कोइरालाले दागबत्ती दिने बताइएपनि सुशीलका दाजु विनोद कोइरालाका छोरा अतुल र भाइ अरुणका छोरा सुधांशुले दागबत्ती दिएका हुन् ।
अन्तिम संस्कार समारोहमा पूर्वप्रधानमन्त्रीहरु, बहालवाला मन्त्रीहरु, विभिन्न दलका नेताहरु, कुटनीतिक निकायका प्रतिनिधिसहित हजारौंको संख्यामा सर्वसाधरणको ओइरो लागेको छ।
प्रधानमन्त्री केपी शर्मा ओलीले आर्यघाट पुगी स्व कोइरालाको पार्थिव शरीरमा राष्ट्रिय झण्डा ओढाई अन्तिम श्रद्धाञ्जलि अर्पण गरे ।
कोइरालालाई अन्तिम श्रद्धाञ्जलि दिन सभामुख, पूर्व प्रधानमन्त्रीहरु, उपप्रधानमन्त्रीहरु, मन्त्रीगण तथा विभिन्न राजनीतिक दलका नेता तथा विभिन्न देशका कूटनीतिक नियोगका प्रतिनिधि पशुपति आर्यघाट पुगेका छन् ।
स्व कोइरालाप्रति अन्तिम श्रद्धाञ्जलि अर्पण गर्ने क्रममा नातेदार, पार्टीका नेता एवम् कार्यकर्ता तथा लाखौँको सङ्ख्यामा भावविह्वल मुद्रामा आर्यघाटमा जम्मा भएका छन् ।
यसअघि दिउँसो २ बजे दशरथ रंगशालाबाट शुरु शवयात्रा थापाथली, सिंहदरवार, पुतलीसडक, कृष्ण पाउरोटी, ज्ञानेश्वर, गौशाला हुँदै ४ बजे पशुपति आर्यघाट पुगेको थियो ।
annapurnapost