माघ २५, २०७२- पश्चिम नेपाल हुँदै प्रवेश भएको वायुको प्रभावका कारण आइतबारदेखि नै देशैभर वर्षा भएको छ । आइतबार मध्यान्हसम्म पश्चिम नेपालमा मात्रै वर्षा भएकामा रातिदेखि काठमाडौंसहित मध्यका विभिन्न स्थान र पूर्वी नेपालसम्मै वर्षा भएको छ ।

‘पानी पार्ने प्रणाली पश्चिमबाट पूर्वतिर सक्रिय भएकाले भोलिसम्मै असर पर्ने देखिन्छ’, जल तथा मौसम पूर्वानुमान महाशाखाका मौसमविद् सुजन सुवेदीले सोमवार विहान कान्तिपुरलाई भने, ‘काठमाडौंसहितको मध्य भागमा भने बेलुकीबाट नै सुधार आउनेछ ।’ सुवेदीका अनुसार मध्य र पूर्वी भागमा बदली भईरहेको छ । आइतबाररातिदेखि सोमवार विहानसम्म धेरै ठाउँमा वर्षासमेत भएको महाशाखाको रेकर्ड छ । दिउँसो पनि केही ठाउँमा वर्षा हुने अनुमान गरिएको छ ।

यो वर्षको हिउँदमा धेरै वर्षा भएको यो पहिलो हो । महाशाखाका अनुसार सबैभन्दा बढी डडेलधुरामा (२५ मिमि) वर्षा भएको छ । त्यस्तै, जुम्लामा (२२ मिमि), काठमाडौंमा (३ मिमि), भैरहवा र सिमरामा -२ मिमि), नेपालगञ्ज, वीरेन्द्रनगर र ओखलढुंगामा (१ मिमि), पोखरामा (०.१ मिमि), धनकुटामा (०.३ मिमि) वर्षा भएको छ ।
काठमाडौंसहितको मध्यभागमा आजै बेलुकीबाट मौसमम सुधार आउने भए पनि पूर्वी भागमा मंगलवारदेखि मात्रै सुधार आउने सुवेदीले जनाए । मौसममा सुधार भएपछि क्रमिक रुपमा ताक्रम पनि बढ्दै जाने अपेक्षा गरिएको छ ।