माघ २२, २०७२- स्थानीय र व्यवसायीले नाकाको धर्नामा राखिएको पाल हटाएपछि रक्सौल नाका भएर ट्रक आउन थालेका छन् ।
असोज ७ गतेदेखि मधेसी मोर्चाको धर्नाले अबरुद्ध नाकाबाट १३५ दिनपछि कन्टेनर नेपाल प्रवेश गरेका छन् । नाका खुलेको घण्टा नबित्दै एक दर्जन कन्टेनर छिरेका छन् ।
मधेसी मोर्चाले नाकामा धर्ना बस्नका लागि नेपाल–भारत सीमा दसगजाको मितेरी पुलमा टाँगेको पाललाई दुवैतिरका स्थानीय र व्यवसायीले शुक्रबार जलाइदिएका थिए । पुलमा राखिएको बाटो छेक्ने ढाट पनि हटाइएको छ ।
नाकाबन्दी अन्त्य गर्नुपर्ने माग बढिरहेको र मोर्चाका नेताहरुले नै वीरगन्ज नाका खोल्नुपर्ने बताइरहेका बेला पाल जलाइएको हो । पुलमा स्थानीय र प्रहरीको उपस्थिति बाक्लो थियो भने साना सवारी साधान र रिक्सा आवत जावत सुरु भएको थियो ।
वीरगन्जपट्टी इनर्वा र छपकैयाका व्यापारी तथा रक्सौलका व्यापारी मिलेर ढाट र पाल हटाएका हुन् ।
यसैबीच नाका खोल्ने आधिकारिक निर्णय नभएको भन्दै तराई मधेस लोकतान्त्रिक पार्टीका महामन्त्री जितेन्द्र सोनल पुन: अबरुद्ध गर्न पुगेका छन् । तर, नाका खुलाउन आएका व्यवसायहीहरु ठूलो संख्यामा रहेका कारण नाका सुचारु नै छ ।
स्थानीयले ‘बन्द गर्ने भए विराटनगर, भैरहवा, नेपालगन्जलगायतका नाका पनि अबरुद्ध गर्न’ भन्दै प्रतिवाद गरेका छन् ।
ekantipur