माघ २०, २०७२- एमाओवादी अध्यक्ष पुष्पकमल दाहालले ‘बुर्जुवा र पुँजीपति’ वर्गका प्रतिनिधि भएकाले बाबुराम भट्टराईले समाजवादी/साम्यवादी क्रान्तिकारी पार्टी छोडेको आरोप लगाएका छन् ।

उनी लगायतका नेताहको बहिगर्मनले एमाओवादीलाई क्रान्तिकारी कार्यदिशा अघि सारेर अघि बढ्न सहज भएको दाहालले उल्लेख गरेका छन् । पार्टीको बैचारिक क्षमतालाई उकास्ने उद्देश्य सहित सैद्धान्तिक प्रशिक्षणका लागि बनाएको ‘पार्टी स्कुल’ को बुधबार उदघाटन गर्दै दाहालले भट्टराईले लिएकोबाटो बारे टिप्पणी गरेका हुन् ।

‘संविधान बनेपछि बुर्जुवा र पुँजीपतिहरुको बाटो कि समाजवाद र साम्यवादको बाटो अपनाउने भन्ने थियो’ अध्यक्ष दाहालले भने, ‘बुर्जुवा र पुँजीवादी बाटोमा जान चाहनेहरु पार्टीको हेडक्वाटर सम्मै थिए, अब छैनन् ।’ उनले कुनै व्यक्तिको विचलनलाई समर्थन गर्न नसक्ने भन्दै भट्टराईको आलोचना गरे ।

बुर्जवा वर्गका प्रतिनिधि भएकाले क्रान्तिलाई दमन गर्नेहरुकै साथ लिएर हिड्न थालेको दाहालको आरोप थियो । ‘हुन त क्रान्तिकारी पार्टीहरुमा हेडक्वाटरसम्मै बुर्जवा प्रतिनिधिहरु संलग्न रहेको विश्वमा विभिन्न कम्यूनिष्ट पार्टीेको इतिहासमा थियो, हाम्रो पार्टीमा पनि त्यस्ता रहेछन् भन्ने घटनाक्रमले पुष्टि भई नै सक्यो,’ अध्यक्ष दाहालले भने ।

उनले अबको दशकको लक्ष्य समाजवादी क्रान्तिमा लागेर मुलुकलाई कायापलट गर्ने भएकाले त्यस अनुसारको सैद्धान्तिक दस्ता निर्माण जरुरी भएको बताए । त्यही आवश्यकता बुझेर सैद्धान्तिक रुपमा पार्टीलाई मजबुत बनाउन स्कुल सञ्चालन गर्न लागिएको दाहालले जानकारी दिए । उनले नेपालका कम्यूनिष्ट पार्टीहरु कर्तव्यच्यूत हुदै गइरहेको टिप्पणी दाहालले गरे ।

मधेसमा भइरहेको राजनीति कम्ष्यूनिष्ट पार्टीहरु कर्तव्यच्यूत भइरहेको उहाहरण भएको दाहालले बताए । ‘२००७ साल २०३६ लगायत विभिन्न कालखण्डमा मधेसमा कम्यूनिष्ट योद्धाहरुले आन्दोलन गरेका थिए, किसान आन्दोलनहरु भएका थिए’ दाहालले भने, ‘जुन बर्गकाविरुद्ध आन्दोलन भएका थिए अहिले त्यही बर्गको हातमा मधेस पुग्दैछ र हामी कम्यूनिष्टहरु लुकेर हिडेदैछौ ।’

गरिब किसानप्रति वर्षौं दमन गर्ने वर्ग नै मधेसमा हावी भएको र त्यसो हुनुमा कम्यूनिष्टहरुका विश्व दृष्टिकोणमा कमजोरी मुख्य कारक भएको दाहालको भनाई थियो ।