सुरेन्द्र काफ्ले
फोटो :चोरी अभियोगमा बाँके प्रहरीले पक्राउ गरि सार्वजिक गरिएका अभियुक्तहरु ।नेपालगन्ज: नक्कली पेस्तोल देखाएर लुटपाट गर्ने दुई जनालाई बाँके प्रहरीले पक्राउ गरी मंगलबार सार्बजनिक गरेको छ ।
पक्राउ पर्नेमा काठमाण्डौ मित्रनगर घर भई नेपालगन्ज–१ मा बस्ने १६ बर्षिय बिनोद तामाङ र सुर्खेत घर भएका २० बर्षिय प्रवेश क्षेत्री रहेका छन् । दुवै अभियुक्तलाई मंगलबार पत्रकार सम्मेलन गरि प्रहरीले सार्वजनिक गरेको हो ।
माघ १४ गते नेपालगन्ज–१ धम्बोझी वाटरपार्कका बोधीप्रसाद खनालको घरबाट दुई थान ल्यापटप, मोवाइल, नगद, सुनचाँदी चोरी गरी फरार रहेका दुबै जनालाई पक्राउ गरिएको बाँकेका प्रहरी प्रमुख प्रहरी उपरीक्षक बसन्त पन्तले जानकारी दिएका छन् ।
‘नक्कली पेस्तोल र चक्कु देखाई खनालको परिवारका सदस्यहरुलाई त्रास देखाई चोरी गरेको पाइएको छ ’– उपरीक्षक पन्तले भने ।
पन्तका अनुसार, घरमा चोरी भएकै दिन घरधनी खनालको मृत्यु भएको छ । घरमा लुटपाट भएपछि फोक्सो सम्बन्धी समस्याबाट समेत पीडित खनालको तनावले मृत्यु भएको हुनसक्ने पन्तले बताए ।
उनले भने,’घरधनी खनालको मृत्युको कारण चोरिपछिको तनाव हुनसक्छ तर मृतकका परिवार पोष्र्टमाटम गर्न तयार छैनन्’ ।
पक्राउ परेका दुबै जना प्लस टुमा अध्ययन गर्दा गर्दै लागुऔषध दुब्र्यसनी भई भारत तर्फ लागेका थिए । भारतको दिल्लीमा केही समय मजदुरी गरेपछि दुबै जना नेपालगन्ज आई धम्बोझीमा डेरी गरी बस्दै आएका थिए ।
सोही समयमा उनीहरुले रुपैडियाबाट नक्कली पेस्तोल, मास्क जस्ता सामान खरिद गरी लुट्ने योजना बनाएको पाइएको जिल्ला प्रहरी कार्यालय बाँकेका प्रहरी नायब उपरीक्षक भिमकिरण बोगटीले बताए ।
‘यिनीहरुले गर्ने चोरीको तरिका डर लाग्दो छ – नायब उपरिक्षक वोगटीले भने, ‘चोरी गर्दा प्रतिबाद गरे मान्छे नै मार्ने मनस्थिती बनाएर जाने गरेको पाइएको छ ।’
annapurnapost