फोटो :फाइल फोटोकाठमाडौँ : नेकपा एमालेका सचिव प्रदीप ज्ञावलीले नाका नखुली प्रधानमन्त्री केपी शर्मा ओलीले भारत भ्रमण गर्नुको अर्थ नहुने बताएका छन ।
‘नाका नखुली प्रधानमन्त्री भारत भ्रमणमा जानु हुन्छ, गएर पनि त्यसको कुनै अर्थ छैन’, रिपोर्टर्स क्लब नेपालले सोमबार गरेको साक्षात्कारमा उनले भने, ‘अविश्वास र नाकाबन्दी नहटी भारत जानु उपयूक्त हुँदैन ।’
यद्यपि उनले भारतले नेपाललाई बुझ्न गरेको गल्ती भएको स्विकार गरिसकेकोले प्रधानमन्त्रीको भारत भ्रमण अघि नै नाका खुल्ने विश्वास ब्यक्त गरे ।
साक्षात्कारमा ज्ञावलीले भारतले नेपालको सँगको यो लडाईबाट केही जित्न नसक्ने दावी गर्दै भुटान र म्यान्मार जस्ता निरकुंश मुलुकसँग सम्बन्ध राख्ने भारतले नेपालमा लोकतान्त्रिक संविधान जारी गर्दा नाकाबन्दी लगाइ दोहोरो मापदण्ड अब धेरै दिन नचल्ने दावी गरे ।
‘आफ्नो आगन वरिपरि आगो बालेर भारतको हित हुँदैन । भारतका नीति निर्माताहरु यो महसुस गरेर सम्बन्ध सुधार्न लागि परेका छन’, उनले भने, ‘हामी नेपालको हित चाहन्छौं । कसैको अहित गर्दैनौ । नेपालले आफ्नो हितको लागि काम गर्दा कसैले टाउको दुखाउनु पर्दैन ।’
प्रधानमन्त्रीले भारतको भ्रमणपछि चीनको भ्रमण गर्ने जानकारी दिँदै ज्ञावलीले चीन भ्रमणको बेला पेट्रोलियम पदार्थ खरिद सम्झौता, विप्पा, स्वतन्त्र ब्यापार र पारवहन सन्धीसहित केरुङसँग आउने रेलमार्गलाई काठमाडौँ हुँदै पोखरा पु¥याउन र नेपालको जलविद्युतमा खुलेर सहयोग गर्न आग्रह गरिने बताए ।
उनले बार्ताबाट मधेस समस्या समाधान, कुटनीतिबाट भारतसँगको सम्बन्ध सामान्य बनाउने र अनुकुल परिस्थिति बनाएर पुनर्निमाण र आर्थिक विकास गर्ने सरकारको लक्ष्य भएको भन्दै अब विखण्डनकारीलाई मधेसमा खेल्न दिनु कसैको पनि हितमा नहुने तर्क गरे ।
ज्ञावलीले भने,‘अझै आन्दोलन जारी राख्ने कि जनता विरोधमा उत्रन्छन कि अतिबादीलाई ठाँउ दिने कुरा हुन्छ । दुबै मोर्चाको हितमा छैन ।’
संघीयता एकै पटक कतै पनि समृद्ध नहुने बरु प्रयोगकै क्रममा समृद्ध हुदै जाने भन्दै यसलाई नमान्नु उचित नहुने तर्क उनले गरे ।
ज्ञावलीले तराईमा पहाड जोडन नहेन कुराले मुलुकलाई गरिबी तिर लैजाने भन्दै पहाड र तराईको आर्थिक सम्बन्ध बुझेर संघीयतालाई अघि बढाउनु पर्नेमा जोड दिए ।
annapurnapost
