माघ १४, २०७२- सत्तारुढ प्रमुख दल एमाओवादीले सरकारको कार्यशैलीप्रति व्यापक असन्तुष्टी जनाएको छ । आफ्नै मन्त्रीहरुको कामसमेत चित्त बुझदो नभएको निष्कर्ष निकाल्दै एमाओवादीको तीन दिन चलेको स्थायी समिति बैठकले कार्यशैली सुधार्न प्रधानमन्त्रीसंगै बिषेश कुराकानी गर्ने निर्णय गरेको छ ।
सरकारको कार्याकाल सय दिन पुरा भइसक्दा पनि जनतामा प्रभाव पार्ने कुनै काम अघि बढ्न नसकेको, काम भन्दा बढी गफ मात्र भइरहेको ठहर एमाओवादीको छ । कार्यशैली सुधार नगरे सरकारप्रतिको विश्वास टुट्ने संभावना रहेको भन्दै एमाओवादीले प्रधानमन्त्री केपी ओलीलाई परिणाममुखी काम गर्न सचेत गराउने भएको छ ।
‘सकरारको काम गर्ने शैली सच्चाउनुपर्ने भएको छ’ एमाओवादी उपाध्यक्ष नारायणकाजी श्रेष्ठले भने,‘ परिणाममुखी हुनेगरी काम अघि बढनुपर्छ र यसका लागि प्रधानमन्त्रीलाई नै ध्यानाकर्षण गराउने कुरा भएको छ ।’ उनका अनुसार अध्यक्ष पुष्पकमल दाहाललाई प्रधानमन्त्रीसंग  सरकारको काम कारवाहीबारे कुरा गर्न बैठकले निर्देश दिएको छ । बैठकमा मन्त्रीहरुको कामबारे समिक्षा भएको थियो । सबै मन्त्रीहरुले परिणाम दिनेगरी काम गर्न नसकेको स्वीकारेका थिए । बैठकमा पार्टीको निर्णयअनुसार मन्त्रीहरुले काम नगरेको, आफूखसुी चल्न थालेको लगायत टिप्पणी सरकारबाहिर रहेका नेताहरुले गरेका थिए । त्यसक्रममा  मन्त्री र अन्य नेताहरुबीच बैठकमै असमझदारी सिर्जना भएको थियो ।
सरकार संञ्चालनका लागि पार्टीले बनाएको समितिसंग समन्वय नगरी मन्त्रीहरुले काम गर्ने गरेको भन्दै बैठकमा उनीहरुको आलोचना भएको थियो । तीन दिन चलेको बैठकको समिक्षा पछि अब पार्टीसंगको समन्वयमा काम गर्ने र सरकारको समग्र कार्यशैली नै सुधार्ने गरी अघि  बढ्नुपर्ने निर्णय भएको छ । मन्त्रीहरुलाई आवधिक योजनाहरु बनाएर मन्त्रालयको काम अघि बढाउन बैठकले निर्देश गरेको छ ।
सरकार सञ्चालनका लागि सहयोग गर्न बनेको  सत्तारुढ दलहरुको उच्चस्तरीय राजनीतिक समितिको संयोजक अध्यक्ष दाहाल नै भएकाले उनलाई पनि सक्रिय हुन बैठकले सुझाव दिएको छ । लामो समयदेखि दाहाल संयोजक रहेको समितिको बैठक बसेको छैन  । समितिमा सरकारमा संलग्न रहेका दलका नेताहरु छन् । समितिबाट पनि सरकारलाई घच्घच्याउन सकिने भएकाले त्यसलाई सक्रिय बनाउनुपर्ने निष्कर्ष एमाओवादीको छ । सबै दलहरु मिलेर सरकारको समग्र कामका एक पटक समिक्षा गर्नु आवश्यक रहेको ठहर एमाओवादीको छ ।
मन्त्रीहरुले  आफूसंग समन्वय नगरी काम गरेका, आफूखुसी चल्न थालेका भन्दै सरकारसंग समन्वय गर्न पार्टीले बनाएको समितिका संयोजक उपाध्यक्ष नारायणकाजी श्रेष्ठले अध्यक्ष दाहाललाई राजिनामा दिएका थिए । तर बिहीबारको बैठकले श्रेष्ठको राजिनामा अस्वीकार गरेको छ । श्रेष्ठलाई राजिनामा फिर्ता लिन र समन्वय समितिको नेतृत्व गर्न बैठकले आग्रह गरेपछि श्रेष्ठ उक्त जिम्मेवारी लिन तयार भएका छन् ।