माघ १२, २०७२- प्रधानमन्त्री केपी शर्मा ओलीले भारतको नाकाबन्दी छिट्टै खुल्ने विश्वास व्यक्त गर्दै नाका नखुलेसम्म आफू भारत भ्रमणमा नजाने बताएका छन् ।

‘यो अघोषित नाकाबन्दी हो, त्यसकारण अघोषित रुपमै खुल्छ । अब एक दुईदिन भित्रै नाकाहरु सहज हुन्छन्,’ दैनिक पत्रिकाका सम्पादक र केही बरिष्ठ पत्रकारसँग मंगलबार बालुवाटारमा भएको अन्तरक्रियामा प्रधानमन्त्री ओलीले भने, ‘नाकाको अवस्था सामान्य नभइ भारत भ्रमण जान्न ।’

प्रधानमन्त्रीले असोज ३ गते ठूलो षड्यन्त्रका बाबजुद संविधान जारी भएको बताउँदै तर बिना सहमति रातारात जारी भएको हल्ला फैलाइएको उल्लेख गरे । ‘सहमतिका नाममा संविधान जारी गर्ने प्रक्रिया एक हप्ता मात्र सारेको भए अहिलेसम्म संविधान जारी गर्न सकिने थिएन । त्यो एउटा षड्यन्त्र थियो,’ उनले भने, ‘यो रातारात जारी भएको संविधान होइन । संबिधानसभाले तयार गरेको संविधानको ड्राफ्ट जनतामा लगेर त्यहाँबाट आएका सुझाव समेटेर सबै बिधि र प्रक्रिया पुर्‍याएर जारी गरिएको हो ।’

प्रधानमन्त्रीले संविधानमा कसैलाई विभेद नगरिएको स्पष्ट पार्दै संघीयता, शक्ति पृथकीकरण, बहुदलिय प्रतिस्पर्धा, स्वतन्त्र न्यायालय, स्वतन्त्र प्रेस मानवअधिकार, असमानता र विभेदको अन्त्य संविधानका आधारभुत मान्यता रहेको बताए । ‘संविधानका बारेमा मतभेद पनि पार्टीहरुमा छैन । राजनीतिक खपतका लागि मतभेद छ भनेर हल्ला फिँजाइएको होला तर सबैलाई मनमनमा लागेको चाँही संविधानमा मतभेद छैन,’ उनले भने ।

संघीयता वैज्ञानिक नभए आयोगमार्फत टुंग्याउन सकिने प्रधानमन्त्रीको धारणा थियो । ‘संघीयताका सिमानामा चित्त बुझेन भने संविधानमा आयोगको व्यवस्था छ । त्यसले टुंगो गर्ला । तर मैले जे भन्छु त्यही गर्नुपर्छ, अहिले नै गर्नुपर्छ भनेर पाखुरा सुर्किदा हुन्छ र,’ प्रधानमन्त्रीको प्रश्न थियो ।

संविधान जारी भएपछिका तीन महिनामा १०७५ जनाले वैवाहिक अंगीकृत नागरिकता पाएको विवरण पेस गर्दै प्रधानमन्त्रीले भने,  ‘यति ठूलो संख्यामा नागरिकता वितरण गरिएको छ अनि नागरिकतामा विभेद छ भन्ने ठाउँ कहाँ बाँकी रह्यो र ?’

मधेसी मोर्चाआबद्ध दलको बोली र व्यवहारमा द्विविधा रहेको प्रधानमन्त्रीको भनाइ थियो । ‘संविधानसभाबाट राजिनामा दिएर हिंडेका सभासदहरु प्रधानमन्त्रीमा एउटालाई हराउन अर्कालाई जिताउन आइपुगे,’ उनले भने, ‘राजीजनामा स्विकृत भयो कि भएन भन्नेतिर पनि उनीहरुको ध्यान गएन ।’

प्रधानमन्त्रीले संविधान संशोधनबाट मधेसी मोर्चा पनि खुसी नै रहेको दाबी गरे । ‘तर उहाँहरु यसलाई खुलेआम स्विकार्न सक्नुहुन्न । किनकि आफूहरुले उठाएको मुद्धा अर्काले बिचैमा खोसिदेला कि भन्ने पिर छ,’ उनले भने ।

सरकार पासा खेलेर बसेको छैन
प्रधानमन्त्रीले असहज अवस्थामा पनि सरकारले तीब्र काम गरेको बताए । ‘सरकार पासा खेलेर बसेको छैन । जनताका असुविधा हटाउने, जनजीवन सहज बनाउने, भूकम्प पीडितलाई राहत दिने, स्थायी आवास बनाउने कुरामा लागिरहेको छ,’ उनले भने, ‘म सँग खेर फाल्ने समय छैन ।’

प्रधानमन्त्रीले मुलुकलाई विकासतिर अघि बढाउँछु भन्दा उडाइएको टिप्पणी गरे । ‘राम्रा काम गर्छु भन्दा मलाइ उडाइयो,’ कतिपय महत्वाकांक्षी घोषणामा हास्यको पात्र बन्नुपरेको बताउँदै प्रधानमन्त्रीले भने, ‘काठमाडौंमा मेट्रो रेल चलाउँछु भन्दा मैले सजाय भोग्नुपर्छ  ।’

प्रधानमन्त्रीले कांग्रेस पनि आफ्नो सरकारमा सहभागी हुनुपर्ने बताए ।