मनिका झा
फोटो :जनकपुरमा आजबाट यातायात शुरु भएपछि बढेको चहलपहल । तस्बिर : मनिका झाजनकपुरधाम : पाँच महिनादेखि सुनसान रहेको जनकपुर बस स्टेन्ड बुधबार भरिभराउ देखिन्थ्यो ।
लामो समयको बन्दपछि यातायात संचालन गर्ने निर्णय हुँदा बस चालक, सहचालक, कर्मचारी र यात्रीहरुको चाप र खुशी हेर्न लायकको थियो ।
थन्काइएका बस लाई विहानै धोएर सफा गरि कर्मचारीहरुले तयार पारेका थिए । संचारमाध्यमहरुबाट बस खुलेको सूचना पाएका यात्रीहरु उत्साहित भएर बस स्टेन्ड पुगेका थिए । जनकपुरबाट महोत्तरी, वीरगञ्ज र जटहीसहितका स्थानहरुको लागि बस सञ्चालन भएपछि यात्रीहरुको घुइँचो लागेको थियो ।
यात्रीहरुको भीडमा गाउँ जान जनकपुरबाट महोत्तरीको बस चढेका रामअनेक चौधरीले आन्दोलनको क्रममा भएको यातायात संचालनको निर्णय अतिनै स्वागत योग्य रहेको बताए ।
यति लामो आन्दोलनमा जनताले अत्याधिक कष्ट पाईसकेको र आन्दोलन सजिलै सकिने अवस्था नरहेकोमा जनतालाई राहत दिन यातायात संचालन गरिँदा आफुहरु धेरै खुशी भएको चौधरीले बताए ।
जनकपुर भिठ्ठामोड सडकखण्डमा चल्ने बसका सहचालक रमेश चौधरीले यातायात संचालनमा आएपछि आफुजस्ता ज्यालादारी जीवन चलाउनेहरुले केही राहत पाएको बताए ।
पाँच महिनादेखि काम नभएर घरमा बसी जेनतेन गुजारा गरिराखेको सुनाउँदै रमेशले अबको दिनमा आन्दोलनका अन्य माध्यमहरु अपनाएर यातायात बन्द नगर्न आन्दोलनरत पक्षहरुसँग आग्रह गरे ।
आन्दोलन लम्बिदैं गएको अवस्थामा बजार, शैक्षिक संस्थान, वित्तीय संस्थाहरु संचालनमा आइसकेकोले यातायातमात्र बन्द गरि सर्वसाधारणलाई कष्ट दिन नहुने यातायात व्यवसायीले मोर्चासँग माग गरेका थिए ।
जनकपुर अञ्चल बस व्यवसायी संघले यातायात खोल्न गरेको आग्रहलाई स्वीकारेपछि आफुहरुले यातायात संचालन गरेको संघका अध्यक्ष मनोज चौधरीले बताए ।
मोर्चाले गर्ने अन्य राष्ट्रिय कार्यक्रमहरुमा आफुहरुको पूर्ण एक्यबद्धता रह्ने विश्वास समेत दिलाउँदै चौधरीले बस व्यवसायीहरु र यस व्यवसायबाट आश्रित हजारौं घरपरिवारलाई ध्यान दिइ यातायात सञ्चालनको निर्णय गरेको जानकारी गराए ।
जनकपुरबाट प्रतिदिन ५ सय यात्रुवाहक बस लामो तथा सानो दुरीका लागि छुट्ने गर्छन भने यहाँ १५ सय भन्दा बढि व्यक्तिले एक दिनमा रोजगारी पाउने गरेका छन् ।
एक दिन बस बन्द हुँदा ३० लाख घाटा बेहोर्नु परेका बेला आन्दोलनको क्रममा अर्बौंको घाटा बस व्यवसायी संघले बेहोरेको चौधरीले बताए ।
मोर्चाको असहयोग आन्दोलनको कारण पेट्रोलियम पदार्थ सहजै पाउन नसकिएकोले महंगो मूल्यमा इन्धन खरिद गरि यातायात संचालन गर्नु परेकोले सबै रुटको बस संचालन विस्तारै हुने यातायात कर्मचारीहरुले जानकारी गराएका छन् ।
सार्वजनिक यातायातसँगै निजी चारपांग्रे सवारी साधानहरु पनि संचालनमा आएपछि सुनसान देखिने सडकहरु भरिभराउ भएका छन् । यातायात संचालन नहँंदा सर्वसाधारणले महंगो भाडामा ईरिक्सा तथा मोटरसाइकलमा गनतव्यतर्फ जाने गरेका थिए ।
annapurnapost