जीबन सेजुवाल
फोटो :हिमपातले सेताम्य मुगुको कार्कीबाडा गाविसको भामबाडा गाउँ । तस्बिर : जीबन सेजुवालमुगु : दुई महिना ढिलो हिमपातले मुगु सदरमुकाम र ग्रामीण क्षेत्र सेताम्य भएका छन् । मंगलबार रातिदेखिको भारी हिमपातले जिल्लाको जनजीवन प्रभावित बनिरहँदा कृषकहरुमा खुसियाली आएको छ ।
असार साउनमा वर्षा नहुँदा खेतैमा अन्नबाली सुकेपछि भोकमरीको चपेटामा परेका यहाँका सर्बसाधरण कातिकमा लगाएको जौ र गँहुसमेत पुस अन्तिमसम्म हिमपात नहुँदा चिन्तामा परेका कृषकहरुमा खुसी फर्केको छ ।
हिमपातले हिउँदे बाली सप्रने भएपछि कृषकहरु खुसी भएका हुन् । जिल्लाको उच्च हिमालि क्षेत्रमा हिमपात शुरु भएको थियो । सदरमुकाम गमगढी र आसपासका गाविसमा भने राति १२ बजेबाट हिमपात भएको हो ।
अघिल्ला वर्षहरुमा कातिक मंसिरमै उच्च हिमाली क्षेत्रमा हिमपात हुने गथ्र्यो । यो पटक एकै दिन जिल्लाका २४ गाविसमै भारी हिमपात हुँदा जिल्लाको जनजीबन प्रभावित बनेको हो ।
भारी हिमपातले सबैभन्दा बढी जिल्लाका सात उच्च हिमाली गाविस मुगु, डोल्पु, किम्री, पुलु, माँग्री, खमाले र रारा सबैभन्दा प्रभावित भएका छन् ।
यी गाविसमा चार फिट भन्दाबढी हिमपता भएको छ । सदरमुकाम असापासका पिना, रोवा, रुगा र कार्कीबाडाको ताल्चामा तिन फिट हिमपात भएको जिल्ला प्रहरी कार्यालयका प्रहरी नायव निरीक्षक सोम थापाले जानकारी दिए ।
थापाका अनुसार सोरु भेगका कालै, धैनकोट, जिमा, फोतु र नार्थपुमा हिमपात भएको छ । खत्याड भेगका गम्था, सेरी, श्रीकोट ह्यागु र सुकाढीकमा समेत भारी हिमपात भएको छ ।
हिमपात बुधबारसम्म भएकाले जिल्लाका सबै सरकारी तथा निजी बिद्यालय, गैरसरकारी संस्था र गमगढी बजार चिसोका कारण बन्द छन् ।ु
सरकारी कार्यालयमा सेवाग्राहीको संख्या शून्य रहेको छ । हिमपातले जिल्लाको एकमात्र रारा बिमानस्थल बन्द हुँदो यात्रु अलपत्र रहेका छन् ।
सुर्खेत नेपालगंज देखि सामन बोकेका ब्यपारीहरुका मालबाहक गाडी जुम्ला जिल्ला र मुगु क्षेत्रमा अलपत्र परेका छन् ।
हिउँदे बाली सप्रिने र बर्षेबाली छर्न खेतगडा जोत्न पनि सजिलो हुने भएकाले अझ बाक्लो हिमपात भए कृषकहरुका लागि राम्रो हुने रुगा गाबिसका बालकृष्ण लावड बताउँछन ।
annapurnapost
