‘एक धर्म र अर्को धर्मवीच अपासी लडाइ चलिरहँदा हामी कहाँ भने धार्मिक सहिष्णुताको अनुभुति हुने काम भएको छ, कार्यक्रमका प्रमुख अतिथि डिआइजी सुवेदीले भने,’नेपालमा मात्रै होइन विश्वमै यो एउटा उदाहरणीय काम हुन सक्छ।’ विभिन्न जातजाति र धर्मवीच द्वन्द्व चलिरहेको अवस्थामा धार्मिक र जातीय सहिष्णुता कायम राख्न यो काम प्रशंसनीय छ।

धार्मिक एकताका साथै प्रहरी नागरिकवीचको सहकार्यको नमूना काम भएको उनले बताए । नागरिक र प्रहरी मिलेर सहकार्य गरेको खण्डमा जस्तासुकै अप्ठेरा कामहरु पनि सहज हुने र समाजमा शान्ति कायम राख्न दुइ निकायवीचको सहकार्य जरुरी रहेको डिआइजी सुवेदीले बताए ।

दुर्गा मन्दिर

मुस्लिमको सक्रियता, तामाङको नेतृत्वमा मन्दिर बन्नु निकै अनौठो काम भएपनि यसले समाजमा सकारात्मक सन्देश लैजाने चितवन प्रहरी प्रमुख एसपी बसन्तुबहादुर कुँवरले विश्वास व्यक्त गरे । देशमा सामाजिक सद्भावको अभाव हुँदा धार्मिक एकता कायम गर्न मन्दिर निर्माण कार्यले ठूलो योगदान दिने एसपी कुँवरले बताए ।

इप्रका दिव्यनगर चौकीका प्रमुख सई मोहम्मद लतिफ अन्सारीले नेपालमा मात्र नभइ विश्वभरि नै धार्मिक सहिष्णुताको सन्देश फैलाउनको लागि नमूना काम गरिएको जानकारी दिए । मन्दिर निर्माणका लागि दिव्यनगर क्षेत्रका स्थानीयसँग सहकार्य गरि चार महिनाको अवधिमा निर्माण पूरा गरिएको उनले बताए ।

‘मुस्लिम भएर हिन्दूको मन्दिर बनाएको भनी धेरै प्रश्न र सोधपुछ पनि भए, सइ अन्सारीले भने,’तर यो काम समाजको हितमा भएकाले गरेको हुँ । सामाजिक सद्भाव कायम राख्न अव एकले अर्कोलाई सम्मान गर्नु जरुरी छ ।’