माघ ३, २०७२- भारतीय प्रहरीले चोरीको गाडी र गाजासहित एक नेपालीलाई पानीट्यांकीवाट पक्राउ गरेको छ ।
नेपाल–भारत सीमाको पानीट्यांकीस्थित एक होटलवाट मोरङ उर्लावारीको सुसन भनिने राजेश्वर लिम्वुलाई शनिवार साँझ पक्राउ गरिएको खोरीवारी प्रहरी कार्यालयले जनाएको छ । लिम्वुको साथवाट करिव एक किलो गाँजा, नेपाल नम्वरको चोरीको मोटरसाइकल र वोलेरो जिप पनि वरामद गरिएको छ ।
अभियुक्त माओवादीका पूर्व नेता  रहेको र उनको लिम्वुको अन्र्तराष्ट्रिय तस्कर गिरोहसँग साठगाठ गरेको भारतीय प्रहरीको दावी छ । नेपालका विभिन्न प्रहरी कार्यालयमा उनका दर्जनौ मुद्दा दर्ता छन् । केही समय अघि उनी जेल समेत बसेका थिए ।
दार्जिलिङ प्रहरीका एसपी अमित पी जावल्गीले लागू औषध, हतियार  कारोवार र मानव अपरहण जस्ता अपराध कर्ममा लिम्वुको संलग्नता पुष्टि भएको बताए । लिम्वुलाई चार दिनका लागि प्रहरी हिरासतमा राखिएको छ ।
इलाका प्रहरी कार्यालय काँकडभिट्टाका डीएसपी श्यामकृष्ण अधिकारीले लिम्वु पक्राउबारे भारतीय प्रहरीले जानकारी गराएको बताए । अधिकारीका अनुसार उनी केही दिन अघि एउटा अपहरण घटनामा समेत संलग्न भएका थिए ।