प्राणी उद्यान तथा  वन्यजन्तुको अनुसन्धान कार्यलाई सहयोग पुर्‍याउन काठमाडौंमा स्थापना गरिने विधि विज्ञान प्रयोगशालाका लागि चीन सरकारले आर्थिक तथा प्राविधिक सहयोग गर्ने भएको छ ।

वनमन्त्री अग्निप्रसाद सापकोटा र चिनिया समकक्षी झाङ जिनलोङबीच बेइजिङमा गत बुधवार भएको सम्झौतामा चीनले त्यस्तो प्रतिबद्धता जनाएको हो ।
वन्यजन्तुको अंग/प्रत्यंग तथा वन्यजन्तुको अवैध व्यापार नियन्त्रणबारे नेपाल र चीनबीच पाँच वर्षे सम्झौता गर्न मन्त्री सापकोटासहित मन्त्रालय, वन्यजन्तु विभाग र डब्लूडब्लूएफ नेपालको टोली चीन गएको थियो ।

यसअघिको पाँच वर्षे सम्झौता सकिएपछि पुन: दुई देशबीच सम्झौता भएको हो । यस्तै, नेपालमा ‘सामुदायिक वन अन्तराष्ट्रिय केन्द्र’ स्थापना गर्न पनि चीनले सहयोग गर्ने भएको छ ।

तातोपानी–खासा र रसुवागढी–केरुङ सडकखण्ड स्तोरउन्नती गर्ने क्रममा पर्ने वातावरणीय प्रभावलाई मध्यनजर गदै ‘ग्रिन इकोनोमिक कोरिडिर’का रुपमा विकास गर्ने नेपालको प्रस्तावप्रति चीनले सहमति जनाएको र दुई पक्षीय प्राविधिक टिम गठन गरी सम्भावयता अध्ययन कार्य बढाउने भएको छ ।

सम्झौताका लागि मन्त्रीसहित वन मन्त्रालयको वैदेशिक सहयोग समन्वय महाशाखा प्रमुख सहसचिव डा.विश्वनाथ ओली, वन्यजन्तु विभागका महानिर्देशक फणीन्द्रराज खरेल, डब्लूडब्लूएफ नेपालका विज्ञ दिवाकर चापागाईँलगायतको टोली चीन गएको थियो । टोली शनिवार फर्किनेछ ।