माघ २, २०७२- भूकम्पपछि रोकिएको कोटेश्वर-कलंकी सडक खण्ड विस्तारको काम नौ महिनापछि सुरु भएको छ । वैसाख १२ मा चिनियाँ कम्पनी सांघाई कन्ट्रक्सनका प्राविधिक र कामदार स्वदेश फर्किएपछि उक्त सडक खण्डको निर्माण ठप्प भएको थियो । कम्पनीका प्राविधिक र कामदार नौ महिनापछि फर्केर निर्माणको काम पुनः थालेका हुन् ।

कोटेश्वर-सातदोबाटो हुदै कलंकी पुग्ने १० दशलमव ३९ किलोमिटरको सडक खण्ड ८ लेनको बनाइनेछ भने त्यहाँ ८ वटा पुल बन्दैछन् । काठमाडौं चक्रपथ सुधार आयोजनाका प्रमुख अशोक तिवारीका अनुसार एक साता अघिबाट काम सुरु गरिएको बताए । उनले भने,’६/७ दिनदेखि उक्त सडक खण्डको काम सुचारु भइरहेको छ ।’

आठैवटा पुलका सब स्ट्रक्चर -तल्लो भाग) निर्माण सकिएको र बाँकी सुपर स्ट्रक्टर -माथिल्लो भाग) निर्माण गर्न बाकि रहेको आयोजना प्रमुख तिवारीले बताए । उनले भने,’मनोहरा पुलको माथिल्लो भागको काम भइरहेको छ ।’

उनले इन्धन अभाव नभए काम तीब्र रुपमा जाने नत्र फेरि काम रोकिन सक्ने संकेत गरे ।

२०७० साल भाद्र २१ बाट यो सडक खण्डको निर्माण सुरु गरिएको थियो । २०७४ को माघको दोस्रो साता यो खण्डको निर्माण पूरा गर्ने लक्ष्य छ । ५ अर्बको लागतमा बन्न लागेको उक्त सडक खण्डको भौतिक प्रगती ३० प्रतिशत भइसकेको तिवारीले जानकारी दिए । उनले कोटेश्वरमा दुई सय मिटर चाहि नमुनाको लागि काम भएको बताए । विभिन्न समयमा काम रोकिएपछि यो योजना समयमै सकिनेमा भने प्रश्न चिन्ह खडा भएको छ ।