फोटो :बालुवाटारमा कूटनीतिक सँगको दिवाभोजमा प्रधानमन्त्री केपी शर्मा ओलीसँग भेट गर्दै नेपालका लागि भारतीय राजदूत रन्जित रे। तस्बिर: प्रधानमन्त्री कार्यालयप्रधानमन्त्री-कूटनीतिक समुदाय दिवाभोज
काठमाडौं: प्रधानमन्त्री केपी शर्मा ओलीले आगामी ६ महिनाभित्र स्थानीय निकायको निर्वाचन हुनेमा आफू विश्वस्त रहेको नेपालस्थित दातृ निकाय तथा कूटनीतिक नियोगका प्रमुखसमक्ष बताएका छन्।
दातृ निकाय तथा कूटनीतिक नियोगका प्रमुखलाई सामूहिक रूपमा पहिलोपटक बिहीबार सरकारी निवास बालुवाटारमा सम्बोधन गर्दै प्रधानमन्त्री ओलीले चरणबद्ध रूपमा स्थानीय निकायको निर्वाचन गर्न राजनीतिक दलसँग परामर्श भइरहेको बताए। भूकम्प प्रभावित जिल्लाबाट स्थानीय निकाय निर्वाचन सुरु गर्ने सरकारको सोचाइ रहेको समेत प्रधानमन्त्री ओलीले बताए ।
‘पुनर्निर्माणको काम अघि बढाउनमात्र नभई स्थानीय निकायका जनप्रतिनिधिको भूमिका विकास निर्माणका कामलाई प्रभावकारी र जिम्मेवार बनाउन पनि उत्तिकै महत्वपूर्ण छ भन्नेमा सरकार जानकार छ’, प्रधानमन्त्री ओलीले भने, ‘विद्यमान कानुनअनुसार स्थानीय निकाय निर्वाचन आयोजना गर्नका लागि सरकार राजनीतिक दलसँग परामर्शमा छ।
भूकम्प प्रभावित जिल्लाबाट स्थानीय निकाय निर्वाचन सुरु भए पुनर्निर्माणको काम अघि बढाउन सहज हुने विश्वास लिइएको छ।’ प्रधानमन्त्री नियुक्त भएयता ओलीले दातृ निकाय तथा कूटनीतिक नियोगका प्रमुखलाई पहिलोपटक सामूहिक रूपमा सम्बोधन गरेका हुन्।
प्रधानमन्त्री ओलीका विदेश मामिलाविज्ञ गोपाल खनालले शनिबारदेखि पुनर्निर्माण अभियान सुरु हुन लागेको सन्दर्भमा प्रधानमन्त्रीले अन्तर्राष्ट्रिय समुदायलाई त्यसबारेमा जानकारी गराएको बताए।लोकतान्त्रिक परिपाटीबाट समावेशी संविधान जारी भई अहिले कार्यान्वयनको चरणमा रहेको प्रधानमन्त्रीले बताए।
नयाँ संविधानअनुरूप बनाउनका लागि थुप्रै कानुनहरू संशोधनको चरणमा रहेको उनले बताए।’संविधानप्रति असन्तुष्ट समूहहरूको चासो सम्बोधन गर्न संविधान संशोधन प्रस्ताव संसद्मा पेस भइसकेको छ। अहिले उक्त संशोधन अनुमोदनको अन्तिम चरणमा छ’, प्रधानमन्त्रीले भने,’आन्दोलनरत दलको जायज चासो सम्बोधन गर्न हामी चाँडै सहमतिमा पुग्नेछौं भन्ने मेरो विश्वास छ।’
१३ बुँदे सम्बोधनका क्रममा प्रधानमन्त्रीले आन्दोलनरत दलसँग सहमति भएसँगै सीमानाकामा जारी तनाव, इन्धनलगायत आपूर्ति व्यवस्थामा रहेको अवरोध हट्ने आशा लिइएको बताए। ‘विद्यमान संकट हल भएपछि विकासका काम अघि बढाउन तथा पुनर्निर्माणलाई गति दिन सहज हुनेछ’, उनले भने।
छिमेकी मुलुकहरू, दक्षिणएसियाली क्षेत्रीय सहयोग संगठन (सार्क) सदस्य, विकास साझेदारलगायत अन्तर्राष्ट्रिय समुदायबाट भूकम्पपछिको उद्धार तथा राहतमा भएको सहयोगको प्रधानमन्त्रीले प्रशंसा गरे।केही समयभित्रै राष्ट्रिय पुनर्निर्माण कार्यान्वयन योजना ल्याइने उनले बताए। आफूले दातृ निकाय तथा छिमेकी मुलुकबाट विगतमा जस्तै सहयोग अपेक्षा गरेको ओलीले बताए।
पुनर्निर्माण प्राधिकरणको कानुन पारित भएपछि पदाधिकारी नियुक्त भई प्राधिकरणले आफ्नो काम तीव्रतर रूपमा सुरु गरिसकेको भन्दै प्रधानमन्त्रीले यसका लागि बजेट र कर्मचारीको व्यवस्था गरिसकिएको जानकारी दातालाई गराए।पुनर्निर्माणको कामलाई सरकारले अवसरका रूपमा लिएको भन्दै त्यसले औद्योगीकरणका लागि आधारशिला खडा गर्ने उनले बताए। तीन महिनाभित्र पुनर्निर्माणको कामले पूर्ण रूपमा गति लिने उनको भनाइ थियो।
जायज भूकम्पपीडितको पहिचान गर्न दोलखाबाट सर्वेक्षण सुरु भएको र त्यसमा सकारात्मक प्रगति हासिल भइरहेको प्रधानमन्त्रीले बताए। पुनर्निर्माणका क्रममा स्थानीय तहमा सरकारले प्राविधिक र आर्थिक सहयोग गर्ने उल्लेख गर्दै प्रधानमन्त्रीले त्यसका लागि स्थानीय समुदायको समेत सहयोग लिइने बताए।
पुनर्निर्माण प्रक्रिया अघि बढाउन जिल्ला तहमा सभासद्को नेतृत्वमा एक समन्वय समिति बन्ने उनले बताए । त्यस्तै क्षेत्रीय तहमा पनि पुनर्निर्माणको अवस्थाबारे अनुगमन गर्न संयन्त्र रहने उनको भनाइ थियो।
पुनर्निर्माणसम्बन्धी कामको कार्यान्वयन भएनभएको अनुगमन प्रधानमन्त्री तथा मन्त्रिपरिषद् कार्यालयले मासिक रूपमा गर्ने प्रधानमन्त्री ओलीले बताए। त्यस्तै कार्ययोजनाअनुसार विभिन्न मन्त्रालयहरूले पनि पुनर्निर्माणको काम समयमा भएनभएकोबारे प्रगति विवरण पेस गर्नुपर्ने व्यवस्था गरिएको उनले बताए।
सीमा अवरोधका कारण इन्धन तथा आपूर्ति ठप्प भई राष्ट्रिय गौरवका विकास परियोजनासमेत प्रभावित भइरहेको प्रधानमन्त्री ओलीले बताए। राजनीतिक समस्याको समाधान भएसँगै दातृ निकायमार्फत कार्यान्वयन भइरहेका परियोजनामा समेत सुधार आउने प्रधानमन्त्रीले बताए।
कूटनीतिक ब्रिफिङमा नेपालका लागि चिनियाँ राजदूत ऊ चुन्ताई, भारतीय राजदूत रञ्जित रे, अमेरिकी राजदूत एलाइना बी तेप्लिजलगायत अधिकांश देशका राजदूत, दातृ निकायका प्रमुख र विभिन्न अन्तर्राष्ट्रिय संगठनका नेपालस्थित प्रतिनिधि सहभागी थिए।
‘दिवाभोजका क्रममा कूटनीतिज्ञले पुनर्निर्माण अभियान सुरु हुन लागेकोमा खुसी व्यक्त गर्दै प्रधानमन्त्रीलाई बधाई दिए’, ओलीका विदेश मामिलाविज्ञ खनालले भने।प्रधानमन्त्रीको ब्रिफिङमा परराष्ट्रमन्त्री कमल थापालाई डाकिएको भए पनि काठमाडौं बाहिर भएका कारण उपस्थित हुन सकेनन्।
परराष्ट्रसचिव शंकर बैरागी बैठकमा सहभागी थिए।यसअघि मन्त्री थापाले मंगलबार परराष्ट्रमा आयोजित कार्यक्रममा कूटनीतिक नियोग र दातृ निकायका प्रमुखलाई राजनीतिक अवस्थाबारे अवगत गराएका थिए।
annapurnapost