सुवास गोतामे
फोटो :फाइल फोटोकाठमाडौं : प्रहरीले काठमाडौं उपत्यकामा सञ्चालित फुटसल अनिश्चितकालका लागि बन्द गराएको छ ।
रमाइलो र स्वास्थ्यका लागि खेलिने फुटसलले समाजमा विकृति बढाउँदै लगेको गुनासो आएपछि महानगरीय प्रहरी परिसरले काठमाडौं उपत्यकाका ५१ वटै फुटसल अनिश्चितका लागि बन्द गर्ने निर्णय गरेको हो ।
रमाइलाको लागि खेलिने यो खेलले हल्ला भएर आफूहरुलाई असर गरेको तथा समाजमा विकृति बढेकोको स्थानीयको गुनासोका आधारमा अनुसन्धानपछि प्रहरीले यो कदम चालेको हो ।
फुस्टलमा मादक पदार्थ र लागूपदार्थ पनि खाने तथा जुवाजन्य गतिविधि बढ्दै गएपछि कानुनी दायरामा नल्याउनजेलका लागि यो खेल बन्द गरिएको हो ।
प्रहरीका अनुसार काठमाडौं उपत्यकाका अधिकांश फुटसल दर्ता नगरी मनलाग्दी सञ्चालन गरेको पाइएको छ ।
‘स्वास्थ्य र रमाइलोका लागि खेलिने यो खेलमा नियमन नहुँदा विकृति बढेको पाइयो’, महानगरीय प्रहरी परिसरका एसपी तथा प्रवक्ता विश्वराज पोखरेलले भने, ‘कानुनी दायरामा ल्याएर मात्र फेरि सञ्चाल गर्न दिन्छौं । यसको नियमन गर्ने कुनै संयन्त्र नभएकाले पनि बन्द गरिएको हो ।’
सन् १९३० मा ब्राजिलबाट औपचारिकरुपमा शुरु भएको इन्डोर मैदानमा खेलिने फुटसल नेपालमा सन् २०११ मा भित्रिएको हो ।
नेपालमा काइजन स्पर्टोस सोलुशन प्रालिले सन् २०११ मा काठमाडौंको ठमेलमा एरेना फुटसल नाममा खेलाउन थालेको हो । यसलाई नेपालमा नवाङ निमा लामाले भित्र्याएका हुन् ।
नेपालमा भित्रेको चार वर्षमै उपत्यका तथा उपत्याका बाहिर पनि फुस्टल विस्तार भएको छ ।
बालबालिकादेखि सबै उमेरकाले खेल्न सकिने यो फुटसल लागि अन्तर्राष्ट्रिय मापदण्ड अनुसार न्यूनतम २५/१६ मिटर र अधिकतम ४२/२५ मिटरको मैदान चाहिन्छ ।
जहाँ एक पटकमा दुई टिमबाट ६-६ जना खेलाडीले प्रतिस्पर्धा गर्न सक्छ । प्रहरीका अनुसार उपत्यकामा मध्यरातिसम्म होहल्ला गर्दै खेल्ने गरेकाले यसको समयसीमा निर्धारण गर्नका लागि पनि बन्द गरिएको हो ।
प्रहरीले सरकारी निकायबाट नियामन गराएर मात्रै फुटसल खुलाउने जनाएको छ । ‘फुटसलका नाममा जुवाजन्य गतिविधि गरेको पनि पाइएको छ’, एसपी पोखरेलले भने, ‘बाजी राखेर खेलिँदा जुवाजन्य गतिविधि बढेको छ भने फुटसलमै लागूपदार्थको प्रयोग गरेको पनि पाइएको छ ।’
annapurnapost