३० पुस, बिराटनगर । सरकारले भारतसँग जोडिएका सीमा क्षेत्रमा विकासका विशेष कार्यक्रम सञ्चालन गर्ने भएको छ ।
सरकारले पहिलो चरणमा तराईका ८ जिल्लामा सीमा क्षेत्र विकास कार्यक्रम सुरु गर्ने भएको हाे । यसका लागि १६ करोड रुपैयाँ विनियोजन भएको छ ।
भारतसँग जोडिएका गाविस र नगरका वडाहरुमा जनताको माग बमोजिम विकासका कार्यक्रम सञ्चालन गर्न लागिएको हो ।
बिराटनगरमा रहेका उप्रधानमन्त्री कमल थापाले भारतीय सिमासँग जोडिएका क्षेत्रको समग्र विकासमा यो रकम खर्च गरिने अनलाइनखबरलाई बताए ।
मन्त्रालय अन्तर्गत संचालन हुने सीमा क्षेत्र विकास कार्यक्रम आगामी माघ ७ गतेदेखि सुरु हुनेछ । यसको औपचारिक सुरुवात महोत्तरीको बर्दिबासबाट हुनेछ ।
स्थानीय विकासमन्त्री समेत रहेका थापाले भने-‘तराई सुगम जिल्ला भएपनि मानव सुचाङ्कमा पछाडी परेको छ ।
यो क्षेत्र समग्र विकासका लागि सरकार विकासको कार्यक्रम लिएर जनताको घर-घर पुग्ने छ ।’
१ सय १० गाविसमा स्वास्थ्य, शिक्षा र पूर्वधार निर्माणमा बजेट खर्च हुने उनले बताए । कार्यक्रमको उपलब्धी हेरेर थप बजेट विनियोजन गर्ने तयारी गरिएको छ ।
onlinekhabar