गोरखा । नेपाली काँग्रेसको संस्थापन पक्षको वडा स्तरीय अधिवेशन चलिरहेको बेला शेरबहादुर काँग्रेसले समेत जिल्लामा गतिविधीलाई तिब्रता दिएको छ ।
ईतर पक्षका शेरबहादुर काँग्रेसले भने गोरखा जिल्लाको संयोजकमा भुगोल थापालाई चयन गरेर १५ औं केन्द्रिय महाधिवशनको तयारी थालेको हो ।
डा.शशांक कोइराला संयोजक रहेको ईतर पक्षले थापालाई जिल्ला संयोजकमा चयन गरेर जिल्लामा गतिविधी तिव्र पार्न भनेको छ ।
डा.कोइरालाले हस्ताक्षर गरेर संयोजक थापालाई थमाएको पत्रमा ‘नेपाली काँग्रेस केन्द्रिय कार्य समितिको आधिकारिकता सम्वन्धी विवाद सम्मानित सर्बोच्च अदालतमा विचाराधिन रहेको अवस्थामा कथित विशेष महाधिवेशन पक्षले महाधिवेशनको कार्यतालिका सार्वजनिक गरी अधिवेशनको गतिविधी गर्न लागेकोले चौधौं महाधिवेशनबाट निर्वाचित हाम्रो बैधानिक केन्द्रिय कार्यसमितिले नेपाली काँग्रेसको १५ औं महाधिवेशन गनुपर्ने बैधानिक दायित्व भएको छ ।’ पत्रमा ‘१५ औं महाधिवेशन मंसिर २१, २२ र २३ गते काठमाडौंमा गर्ने गरी, असोज १५ गते वडा अधिवेशन, असोज २० गते पालिका अधिवेशन, असोज २३ गते प्रदेश सभा निर्वाचन क्षेत्र एवं प्रतिनिधिसभा निर्वाचन क्षेत्र क्षेत्रिय अधिवेशन, कार्तिक १५ गते जिल्ला अधिवेशन, मंसिर ४ गते प्रदेश अधिवेशनहरु गर्ने निर्णय भएको छ । अधिवेशन सम्पन्न गर्नका लागि जिल्लाका साथीहरुको राय सुझाव र केन्द्रिय प्रतिनिधिको सिफारीसमा तपाईलाई गोरखा जिल्ला संयोजक मनोनय गरिएको छ’ भनिएको छ ।
थापा बिगतमा पनि शेरबहादुर देउवा पक्षमा जिल्लामा क्रियाशिल राजनीति गर्दै आएका ब्यत्ती हुन ।
