साँकेतिक तस्बिर
गाेरखा । काठमाडौँको ठमेलबाट पक्राउ परेका १० जना बङ्गलादेशी नागरिकबारे अध्यागमन विभागले अनुसन्धान थालेको छ । प्रहरीले सोमबार काठमाडौँ–२६ स्थित ठमेल क्षेत्रका होटलहरुबाट पक्राउ गरेर बङ्गलादेशी नागरिकहरूलाई अध्यागमन विभागमा पठाएको छ ।
शङ्कास्पद गतिविधिमा संलग्न रहेको सूचना पाएपछि १० जनालाई पक्राउ गरिएको उपत्यका अपराध अनुसन्धान कार्यालयले जनाएकाे छ ।
पक्राउ पर्नेहरूमा ४६ वर्षीया फहिमा अक्तर हसन, ४८ वर्षीय महमुद, ४५ वर्षीय महबुब हसन, ४९ वर्षीय रिपोन महमुद, ३० वर्षीय एमडी करामत अलीखान, ३० वर्षीय साहिदुर रहमान, ५० वर्षीय एमडी खलिलुर रहमान, २८ वर्षीय आरिफुर रहमान, ४२ वर्षीय एमडी मारुफ मिर्धा र ६४ वर्षीय मोहम्मद हनिफ मिया छन् ।
उनीहरूलाई प्रहरीले ठमेलको होटल ढाका एक्सप्रेस, होटेल डि भेढा र होटेल अलरहमानलगायतबाट पक्राउ गरेको हो ।
ठमेलस्थित मुस्लिमा टोलमा बस्ने उनीहरुले झैँ झगडा गर्ने गरेको भिसाको प्रयोजन विपरीत काम गर्ने गरेको अनुसन्धानले देखाएको छ ।
यसअघि पनि बंगलदेशीहरुले बङ्गलादेशबाट युवाहरूलाई विकसित मुलुकमा पठाउँछौ भनेर नेपाल बोलाउने र उनीहरूसँग माेटाे रकम असुल गर्ने गरेको आरोपमा प्रहरीले पक्राउ गरेर अनुसन्धान गर्दै आएको थियो ।