गाेरखा । सशस्त्र प्रहरी बल नेपालकाे टाेलीले महोत्तरी जिल्लाको सोनमा गाउँपालिका–६ मगरथानाबाट आज बिहान २ कराेड भन्दा बढी मूल्य बरावरकाे एप्पल कम्पनीको एयर वर्डस बरामद गरेको छ ।
सशस्त्र प्रहरीकाे टाेलीले २ करोड ४० लाख रुपैयाँ बराबरको एप्पल कम्पनीको एयर वर्डस बरामद गरेको सशस्त्र प्रहरी बल नेपालका सशस्त्र प्रहरी नायब उपरिक्षक एवं सहप्रबक्ता शैलेन्द्र थापाले जानकारी दिए ।
भारतबाट अवैध रुपले नेपालतर्फ ल्याउँदै गरेको १ हजार २०० थान एयर वर्डस सशस्त्र प्रहरी बल नेपाल नं. ९ गण महोत्तरी, सीमा सुरक्षा गुल्म रघुनाथपुर र बोर्डर आउट पोष्ट खैरवनीले संयुक्त रुपमा बरामद गरेको उनले बताए ।
उक्त एयर वर्डस ल्याउने व्यक्ति भने सशस्त्र प्रहरीको गस्ती टोलीलाई देख्नासाथ फरार भएका थिए । बरामद एयर वर्डस आवश्यक कारवाहीको लागि सम्बन्धित निकायमा बुझाइएको पनि उनले जानकारी दिए ।