गाेरखा । तनहुँको व्यास नगरपालिका–१२ छिर्कनेस्थित पृथ्वीराजमार्गमा ट्रक र टमाटर बोकेको पिकअप ठोक्किँदा २ जना घाइते भएका छन् ।
शुक्रबार बिहान करिब ७ बजे दमौलीबाट डुम्रेतर्फ जाँदै गरेको म.प्र.०३–००१ क ३८३६ नम्बरको ट्रक र विपरीत दिशाबाट आउँदै गरेको बा.प्र.०१–०२६ च ५६२९ नम्बरको पिकअप ठोक्किएकाे जिल्ला प्रहरी कार्यालय तनहुँले जनाएकाे हाे ।
दुर्घटनामा पिकअप चालक धादिङ बेनिघाट रोराङ–८ का १९ वर्षीय आशन चेपाङ र सहचालक २१ वर्षीय कुमार चेपाङ घाइते भएका छन् ।
दुवैलाई उद्धार गरी उपचारका लागि प्रदेश अस्पताल दमौली पठाइएको प्रहरीले जनाएको छ । घटनामा संलग्न ट्रक चालकलाई प्रहरीले नियन्त्रणमा लिइएको छ ।
दुवै सवारीसाधन हटाएर सडक सुचारु गरिएको पनि तनहुँ प्रहरीले जनाएकाे छ ।