गाेरखा । रोल्पाको थबाङ गाउँपालिका ५ उवा कोटलबारा गाउँमा अस्ति बुधबार रातिको पहिरोमा परेर १० जनाको ज्यान गएको पुष्टि भएको छ ।
३ जना अझै बेपत्ता रहेकाे रोल्पा प्रहरीले जनाएको छ । प्रहरीका अनुसार ५ जनाको शव रोल्पाका विभिन्न ठाउँमा भेटिएको छ भने अन्य ५ जनाको शव छिमेकी जिल्ला प्युठानका खोला किनारमा भेटिएका छन् ।
पहिरोमा परी घाइते भएका २ जनाको प्रादेशिक अस्पताल बुटवलमा उपचार भैरहेको छ । पहिरोमा परेर ९ वटा घर, १ घुम्ती पसल, २ गोठ र १ चर्च गरी १३ वटा संरचना बगाएको प्रहरीले जनाएको छ ।
पहिरोमा पुरिएका पशुचौपायाको संख्या र अरु क्षतिको गणना नै हुन नसकेको प्रहरीले जनाएकाे छ ।
स्थानीयका अनुसार पूर्वी रोल्पाको सुलिचौरदेखि उवा हुँदै थबाङ पुग्ने सडक त्यसै गाउँबाट खनिएकाले माटोको थुप्रो बन्दा लेदोसहितको पहिरो खसेको हो ।
