गाेरखा । राष्ट्रिय स्वतन्त्र पार्टी (रास्वपा)को प्रथम महाधिवेशन चितवनमा आजदेखि सुरु हुने भएकाे छ । महाधिवेशनलाई व्यवस्थित र प्रतिनिधिमूलक बनाउन आवश्यक अधिकांश व्यवस्थापनको काम पूरा भएको रास्वपाका प्रवक्ता मनिष झाले जानकारी दिए ।
भरतपुरको गेष्टहाउस चौरमा हुने रास्वपाको महाधिवेशनको उद्घाटन पार्टी सभापति रवि लामिछाने र प्रधानमन्त्री तथा वरिष्ठ नेता वालेन्द्र शाहले संयुत्त रुपमा गर्ने कार्यक्रम छ ।
प्रवक्ता झाका अनुसार देशभरका जिल्ला, प्रदेश तथा विदेशस्थित सम्पर्क समितिबाट प्रतिनिधि छनोटको प्रक्रिया पूरा भइसकेको छ । महाधिवेशनस्थल व्यवस्थापन, आवास, यातायात, सुरक्षा तथा स्वयंसेवक परिचालनलगायत काम सकिएको छ ।
अधिवेसनबाट १५१ सदस्यीय केन्द्रीय सचिवालय सदस्य बन्ने छन् । हाल रास्वपामा १२१ केन्द्रीय सदस्य छन् ।
हालै गरिएकाे विधान संशाेधनले १ सभापति, १ वरिष्ठ नेता, १ महिलासहित उपसभापति ३, महामन्त्री २, १ महिलासहित सहमहामन्त्री ५, प्रवक्ता १, १ महिलासहित सहप्रवक्ता २, कोषाध्यक्ष १ तथा १ महिलासहित सहकोषाध्यक्ष २ जना रहनेछन् ।
यस्तै विधानले १५१ सदस्यमध्ये ५१ जना केन्द्रीय सदस्य पार्टी सभापतिले मनोनय गर्नेगरी विधान संशोधन गरिएको छ । अब रास्वपामा खुला प्रतिस्पर्धाबाट ९९ जना केन्द्रीय समिति चयन हुनेछन् ।
महाधिवेशनमा ३ हजार ९१८ प्रतिनिधि हुनेछन् । त्यसमा ३०० प्रतिनिधि रास्वपाका २ महामन्त्रीलाई मनोनयनको जिम्मेवारी प्रदान गरिएको छ ।
रास्वपाले पार्टी सदस्य ५ लाख पुर्याएको छ । सचिवालय सदस्य हरि ढकालका अनुसार ६१० पालिकामा अधिवेशन सम्पन्न भइसकेको छ भने ४ हजार ६३ वडामा अधिवेशन गरिएको छ ।
६ प्रदेश ६४ जिल्लामा अधिवेशन सम्पन्न भएर प्रतिनिधि छनोट भइसकेका छन् । मधेस प्रदेश र निर्वाचन हुन बाँकी छ ।