गाेरखा । नेपाल लेयर्स कुखुरापालक सङ्घले अण्डाको मूल्य पुनःबढाएको छ । सङ्घको शुक्रबारदेखी लागु हुने गरी अण्डाकाे मूल्य बढाएको हो ।
सङ्घका अध्यक्ष विनोद पोखरेलका अनुसार देशभरका अण्डा उत्पादक किसान तथा व्यवसायीको राय, परामर्श तथा सिफारिसका आधारमा चितवनलाई मुख्य आधार क्षेत्र मानी नयाँ दररेट तय गरिएको हो ।
नयाँ मूल्यसूचीअनुसार एक्सएल अण्डाको मूल्य प्रतिक्रेट ५६०, ठूलो अण्डाको ५४५, मध्यम अण्डाको ५१५ तथा सानो अण्डाको प्रतिपेटी ३ हजार कायम गरिएको छ । यसअनुसार खुद्रा बजारमा अण्डाको मूल्य अब करिब २५ रुपैयाँ पुगेको छ ।
अध्यक्ष पोखरेलले गर्मी मौसमका कारण उत्पादनमा आएको उतारचढाव तथा किसानको बढ्दो उत्पादन लागतलाई ध्यानमा राखेर नयाँ मूल्य निर्धारण गरिएको बताए ।
पछिल्लो एक महिनाको अवधिमा अण्डाको मूल्य निरन्तर उकालो लागेको छ । वैशाख २४ गते एक्सएल अण्डाको मूल्य प्रतिक्रेट ४६५ रहेकामा नयाँ मूल्य ५६० पुर्याएको छ । जुन करिब २० प्रतिशतले बढी हो ।
किसानले दाना, औषधि तथा अन्य उत्पादन सामग्रीको लागत बढ्दै जाँदा मूल्य समायोजन आवश्यक भएको सङ्घका अध्यक्ष पोखरेलले जानकारी दिए ।
उनका अनुसार हाल अण्डाको उत्पादन लागत प्रतिगोटा १९ रुपैयाँ १२ पैसा परेको छ । नयाँ मूल्य लागू भएपछि किसानले राहत पाउने उनकाे विश्वास छ ।
