गाेरखा । हाल नेपालमा उपल्लो वायुमण्डलमा रहेको पश्चिमी न्यून चापीय रेखा तथा स्थानीय वायुको आंशिक प्रभाव रहेको मौसम पूर्वानुमान महाशाखाले जनाएको छ ।
जसका कारण अहिले लुम्बिनी, कर्णाली र सुदूरपश्चिम प्रदेश लगायत बाँकी हिमाली तथा पहाडी भागमा साधरणतया बादल र तराईमा मुख्यतया सफा रहेको महाशाखाले जनाएकाे छ । बागमती र गण्डकी प्रदेशको पहाडी र हिमाली भागको थोरै स्थानमा हल्कादेखि मध्यम वर्षा भइरहेको छ ।
आजै दिउँसो देशको हिमाली र पहाडी भागमा साधरणतया बादल लाग्नेछ भने तराईमा आंशिक बादल लाग्नेछ । कोशी, लुम्बिनी, कर्णाली प्रदेशलगायत देशको हिमाली र पहाडी भागका केही स्थानहरूमा तथा तराईका केही स्थानमा चट्याङ्गसहित मध्यम वर्षाको सम्भावना रहेको पनि महाशाखाले जनाएकाे छ ।
मधेस, बागमती, गण्डकी, लुम्बिनी र सुदूरपश्चिम प्रदेशका तराईका केही स्थानहरूमा गर्मी बढ्ने सम्भावना रहेको छ ।
आज राती कोशी प्रदेशलगायत देशको हिमाली र पहाडीमा साधरणतया बादल, मधेस, बागमती र गण्डकी प्रदेशका तराईमा आंशिक बादल लाग्नेछ ।
कोशी प्रदेशलगायत देशको हिमाली भागको केही स्थानहरू, मधेस प्रदेश तथा बागमती र गण्डकी प्रदेश पहाडी भागकाे केही स्थानमा हल्का वर्षाको सम्भावना रहेको महाशाखाले जनाएको छ ।