गाेरखा । देशका मध्य र पूर्वी क्षेत्रका धेरै ठाउँमा हिजो दिउँसो र राति पानी परेको छ । वर्षाका कारण गर्मी केही कम भएको छ । प्रदूषण पनि घटेपछि केही राहत पुगेको छ । तर पश्चिमका धेरै ठाउँमा भने वर्षा नभएकाले चर्को गर्मी कायमै छ ।
लुम्बिनी र सुदूरपश्चिम प्रदेशका तराईका ठाउँमा आज पनि तातो हावा चल्ने सम्भावना रहेको मौसम पूर्वानुमान महाशाखाले जनाएको छ । भोलि भने देशका अरु ठाउँमा जस्तै पश्चिममा पनि पानी पर्ने सम्भावना छ । पानी परेपछि भोलि पश्चिम तराईमा पनि गर्मी कम हुने महाशाखाको पूर्वानुमान छ ।
आज कोशी, बागमती र गण्डकी प्रदेशको हिमाली र पहाडी भागका केही ठाउँहरुमा तथा लुम्बिनी प्रदेशको पहाडी र हिमाली भाग लगायत कर्णाली र सुदूरपश्चिम प्रदेशको हिमाली भागका केही स्थानमा मेघगर्जन र चट्याङसहित मध्यम वर्षा र हिमपातको सम्भावना छ ।
भोलि सबै प्रदेशका धेरै ठाउँमा मेघगर्जन र चट्याङसहित मध्यमसम्मको वर्षा र हिमपातको सम्भावना रहेको महाशाखाले जनाएको छ । हिजो गण्डकी प्रदेशको केही ठाउँहरुमा, बागमती र लुम्बिनी प्रदेशको थोरै ठाउँहरुमा तथा कोशी र मधेश प्रदेशको केही स्थानमा मेघगर्जन र चट्याङसहित मध्यमसम्मको वर्षा र हिमपात भएको थियो । केही ठाउँमा हावाहुरीसमेत चलेको थियो ।
यो हप्ताभरी बदली र वर्षा हुने महाशाखाले जनाएको छ । महाशाखाका अनुसार अहिले नेपालमा पश्चिमी र स्थानीय वायुको साथै पूर्वी भाग नजिक तल्लो वायुमण्डलमा रहेको न्यूनचापीय क्षेत्रको आंशिक प्रभाव रहेको छ ।