गाेरखा । माैसममा आएकाे परिवर्तन संगै सबै प्रदेशको पहाडी र हिमाली क्षेत्रमा आज र भोलि पानी पर्ने सम्भावना देखिएकाे जल तथा मौसम पूर्वानुमान महाशाखाले जनाएको छ ।
त्यस्तै लुम्बिनी प्रदेशको तराई भागका केही स्थानमा पनि आज मेघ गर्जन र चट्याङ्गसहित मध्यमसम्म वर्षाको सम्भावना रहेको महाशाखाले जनाएको छ ।
गए राति कोशी, गण्डकी, बागमती र लुम्बिनी प्रदेशका केही ठाउँमा ठूलो पानी परेको थियो । लमजुङको फलेनीमा सबैभन्दा धेरै ८२.६ मिलिमिटर वर्षा मापन भएको छ ।
त्यस्तैगरी, प्युठानको फोप्लीमा ६१.६ मिलिमिटरसम्म पानी परेको महाशाखाले जनाएको छ । बागमतीको काभ्रे पनौती खोपासीमा ६४.२ मिलिमिटर वर्षा भएको छ भने लुम्बिनी प्रदेशको रुकुमकोटमा ६८.४ मिलिमिटर वर्षा मापन भएको छ ।
अहिले देशमा पश्चिमी र स्थानीय वायुको प्रभाव छ । तल्लो वायुमण्डलमा पूर्वी वायुको समेत प्रभाव देखिएकोले केही ठाउँमा पानी परेको महाशाखाले जनाएको छ ।
आज पनि तराई क्षेत्रमा भने गर्मी कायमै छ । यसबीचमा मधेश, बागमती र गण्डकी प्रदेशका तराईका केही ठाउँमा वर्षाको गतिविधि बढ्न सक्ने देखिएकाले पानी परेपछि केही शीतल महसुस हुनेछ ।
अहिले प्रि-मनसुनको समय भएकाले पानी र हिउँसँगै मेघ गर्जन चट्याङसहित असिना र हावाहुरीको पनि सम्भावना हुने भएकाले सावधानी अपनाउन महाशाखाले अनुरोध गरेको छ ।