गाेरखा । नेपालमा हाल पश्चिमी र स्थानीय वायुको आंशिक प्रभाव देखिएको छ । यसकै कारण गण्डकी, कर्णाली र सुदूरपश्चिमका पहाडी तथा हिमाली क्षेत्रमा बादल लाग्नुका साथै केही स्थानमा वर्षा र हिमपात भइरहेको छ ।
देशको दक्षिणी भेग भने प्रचण्ड गर्मी बढेको छ । विशेषगरी लुम्बिनी र सुदूरपश्चिम प्रदेशका तराई क्षेत्रमा आगामी ३ दिनसम्म मध्यम खालको तातो लहर अर्थात् ‘हिट वेभ’ चल्ने देखिएकाले मौसम पूर्वानुमान महाशाखाले विशेष बुलेटिन जारी गर्दै सतर्कता अपनाउन आग्रह गरेको छ ।
महाशाखाको विश्लेषण अनुसार लुम्बिनी र सुदूरपश्चिमका तराईका थोरै स्थानमा अधिकतम तापक्रम ४० डिग्री सेल्सियस वा सोभन्दा बढी पुग्ने अनुमान छ ।
यसबाट कञ्चनपुर, कैलाली, डोटी, बर्दिया, बाँके, सुर्खेत, दाङ, कपिलवस्तु र रुपन्देही लगायतका जिल्लाहरू बढी प्रभावित हुने देखिन्छ । यी क्षेत्रका बासिन्दाले तातो हावाका कारण थकान, कमजोरी, बढी तिर्खा लाग्ने, टाउको दुख्ने र चक्कर आउने जस्ता स्वास्थ्य समस्या भोग्नुपर्ने हुनसक्छ। कतिपय अवस्थामा बेहोस हुने र मांसपेशी दुख्ने समस्या समेत देखिने भएकाले स्वास्थ्यप्रति विशेष ध्यान दिन जरुरी छ ।
गर्मीको यो जोखिमबाट बच्न दिउँसोको चर्को घाममा बाहिर ननिस्कन र घरभित्रै चिसो स्थानमा बस्न सुझाव दिइएको छ । बाहिर निस्कनै परे टाउको छोप्ने, टोपी लगाउने र हल्का सुतीका कपडा प्रयोग गर्नु बुद्धिमानी हुनेछ ।
शरीरमा पानीको मात्रा कम हुन नदिन पटक-पटक पानी, जुस वा सर्वत जस्ता झोल पदार्थ पिउनु आवश्यक छ । यदि स्वास्थ्यमा कुनै पनि असामान्य समस्या देखिएमा तुरुन्त स्वास्थ्यकर्मीसँग सल्लाह लिन समेत महाशाखाले अनुरोध गरेको छ ।
आउँदो साताको सुरुदेखि मधेस, बागमती र गण्डकी प्रदेशका केही स्थानमा वर्षाको गतिविधि बढ्ने सम्भावना छ । यसले गर्दा ती क्षेत्रको तापक्रममा सामान्य गिरावट आउने र वायु प्रदूषण तथा तुवाँलोको अवस्थामा पनि सुधार हुने अपेक्षा गरिएको छ ।
शनिबार कोशी, बागमती र गण्डकीका पहाडी भेगमा मेघगर्जन र चट्याङ्गसहित वर्षाको सम्भावना रहेकाले पहाडी भेगमा भने गर्मीबाट केही राहत मिल्ने देखिन्छ । तर, लुम्बिनी र सुदूरपश्चिमका तराई, उपत्यका र खोँचहरूमा भने अझै केही दिन तातो दिन कायमै रहने भएकाले सावधानी अपनाउनु पर्नेछ ।