गाेरखा । नेपालमा हाल पश्चिमी वायु र स्थानीय वायुको आंशिक प्रभावले मौसममा फेरबदल आएको छ । मौसम पूर्वानुमान महाशाखाका अनुसार अहिले कोशी, बागमती र गण्डकी प्रदेशका पहाडी तथा हिमाली क्षेत्रमा साधारणतया बादल लागेको छ भने बाँकी पहाडी भागमा आंशिक बदली भएको छ ।
तराईका जिल्लाहरूमा भने अहिले मौसम सामान्यतया सफा नै रहेकाे छ ।
आज कोशी प्रदेशका पहाडी र हिमाली क्षेत्रसहित देशका अन्य हिमाली भागमा साधारणतया बादल लागेकाे महाशाखा जनाएकाे छ । कोशी प्रदेशको तराई क्षेत्र र अन्य पहाडी भागमा आंशिक बदली हुने भए पनि बाँकी तराईका क्षेत्रमा मौसम सफा रहने छ ।
यद्यपि, गण्डकी, कर्णाली र सुदूरपश्चिम प्रदेशका हिमाली भेगका केही स्थानहरूमा हल्का वर्षा र हिमपातको सम्भावना छ । कोशी र अन्य प्रदेशका पहाडी भागका केही स्थानमा मेघगर्जन र चट्याङ्गसहित हल्का वर्षा हुने सम्भावना पनि छ ।
विशेषगरी लुम्बिनी र सुदूरपश्चिम प्रदेशका तराई क्षेत्रमा आज हावाहुरी चल्ने सम्भावना रहेकाले सतर्कता अपनाउन मौसमविद्ले आग्रह गरेका छन् । पहाडमा वर्षा र तराईमा हावाहुरीको यो मिश्रित प्रभावले जनजीवनमा सामान्य असर पर्न सक्ने देखिएको छ ।