गाेरखा । आज पनि देशका पहाडी तथा हिमाली भागमा मेघगर्जन र चट्याङसहित मध्यम वर्षा र हिमपातको सम्भावना रहेको मौसम पूर्वानुमान महाशाखाले जनाएको छ । महाशाखाका अनुसार गएराति कर्णाली र सुदूरपश्चिम प्रदेशका पहाडी भागका केही स्थानमा मेघगर्जन र चट्याङसहित हल्का वर्षा र हिमपात भएको थियाे ।
अहिले देशका केही पहाडी तथा हिमाली भागमा सामान्यतया बादल लागेको छ भने बाँकी भागमा मौसम मुख्यतया सफा रहेकाे छ । आज दिउँसो पनि हिमाली र पहाडी भागमा सामान्यतया बादल लाग्ने तथा बाँकी भागमा आंशिक बादल लाग्ने अनुमान महाशाखाले गरेकाे छ ।
रातको समयमा हिमाली भागमा सामान्य तथा पहाडी भागमा आंशिक बादल लाग्नेछ र तराईमा मौसम मुख्यतया सफा रहने महाशाखाले जनाएको छ ।
कोशी, गण्डकी र कर्णाली प्रदेशका हिमाली भागका केही ठाउँमा तथा बागमती, लुम्बिनी र सुदूरपश्चिम प्रदेशका हिमाली भागका केही स्थानमा मेघगर्जन र चट्याङसहित हल्का वर्षा र हिमपातको सम्भावना रहेको छ ।
अहिले देशभर पश्चिमी न्यूनचापीय प्रणाली र स्थानीय वायुको प्रभाव रहेको छ ।