गाेरखा । हाल नेपालमा पश्चिमी न्यून चापीय प्रणाली र स्थानीय वायुको आंशिक प्रभाव रहेको मौसम पूर्वानुमान महाशाखाले जनाएको छ । देशको हिमाली क्षेत्रमा साधरणतया बादल लागेको छ भने कोशी प्रदेशको पहाडी क्षेत्र र मधेसमा आंशिक बादल लागेको छ । बाँकी क्षेत्रमा मौसम मुख्यतया सफा रहेको छ ।
आज दिउँसो कर्णाली र सुदूरपश्चिम प्रदेश लगायत बाँकी प्रदेशको पहाडी र हिमाली स्थानहरुमा साधरणतया बादल लाग्ने तथा बाँकी स्थानमा आंशिक बादल लाग्नेछ ।
कर्णाली र सुदूरपश्चिम प्रदेशको पहाडी र हिमाली स्थानका केही स्थानहरू, लुम्बिनी र गण्डकी प्रदेशको पहाडी र हिमाली स्थानका थोरै स्थानहरू तथा कोशी र बागमती प्रदेशको पहाडी र हिमाली क्षेत्र लगायत सुदूरपश्चिम प्रदेशको तराईका केही स्थानमा चट्याङ्ग र असिनासहित मध्यम वर्षाको सम्भावना रहेको छ ।
आज राति लुम्बिनी, कर्णाली र सुदूरपश्चिम प्रदेश लगायत गण्डकी, बागमती र कोशी प्रदेशको पहाडी र हिमाली केही स्थानमा साधरणतया बादल लाग्ने तथा बाँकी तराईमा आंशिक बादल रहनेछ ।
कर्णाली र सुदूरपश्चिम प्रदेशका केही स्थानहरू, लुम्बिनी र गण्डकी प्रदेशको पहाडी र हिमाली भू-भागका थोरै स्थानहरू तथा बागमती र कोशी प्रदेशको हिमाली भू-भागका केही स्थानमा चट्याङ्ग र असिनासहित मध्यम वर्षा तथा हिमपातको सम्भावना रहेको महाशाखाले जनाएको छ ।