गाेरखा । एमाले केन्द्रीय सदस्य एवम् कास्की इन्चार्ज कृष्ण थापाको निधन भएको छ ।
पोखरा महानगरपालिका-९ शान्तिवनमा रहेको जिल्ला पार्टी कार्यालयमा बैठकमा बोल्ने क्रममा दिउँसो एक्कासि ढलेपछि उनलाई मणिपाल अस्पताल पुर्याइएको थियो ।
अस्पताल पुर्याएलगत्तै चिकित्सकले उनलाई मृत घोषणा गरेका थिए । अस्पतालका अनुसार उनकाे ह्रदयघातका कारण निधन भएको हो ।
कास्की–१ को चुनावको समीक्षा बैठकलाई १० मिनेट सम्बोधन गरेपछि उनी बेहोस भएका थिए । यसपटकको प्रतिनिधि सभा चुनावमा पार्टीले उनलाई कास्की २ मा टिकट दिएको भोलिपल्टै खोसेर अर्कै उम्मेदवारलाई दिएको थियो ।
२०५४ सालमा पोखराको मेयर निर्वाचित थापा २०७४ सालमा गण्डकी प्रदेश सभा सदस्यमा निर्वाचित भएका थिए । ०७९ सालमा उनी पोखरा महानगरको मेयरमा धनराज आचार्यसँग पराजित भएका थिए ।