गाेरखा । निर्वाचन आचारसंहिता उल्लङ्घन गरेको अभियोगमा निर्वाचन आयोगले २ जना उम्मेदवार र १ राजनीतिक दललाई नगद जरिवाना गर्ने निर्णय गरेको छ ।
केन्द्रीय निर्वाचन आचारसंहिता तथा अनुगमन समितिले नेपाली कम्युनिष्ट पार्टीका उम्मेदवार शक्तिबहादुर बस्नेत, स्वतन्त्र उम्मेदवार डा. निकोलस भुसाल र श्रम शक्ति नामक राजनीतिक दललाई जनही २५ हजार रुपैयाँ जरिवाना गर्ने निर्णय गरेको हो ।
आयोगले सोधेको स्पष्टीकरण चित्तबुझ्दो नभएपछि उनीहरूलाई कारबाही स्वरूप जरिवाना तिराउने निर्णय भएको निर्वाचन आयुक्त सगुन समशेर जबराले जानकारी दिए ।
बिहीबार आयुक्त जबराले आचारसंहिता विपरीत कार्य गर्ने जोकोहीलाई प्रमाणका आधारमा कारबाहीको दायरामा ल्याइने स्पष्ट पारे । आयोगले २ जना कर्मचारीलाई सचेत गराउनुका साथै आचारसंहिताको ख्याल नगरी जागिरबाट निकालिएका एक संस्थानका कर्मचारीलाई तत्काल पुनर्वहाली गर्न समेत निर्देशन दिएको छ ।
हालसम्म देशभरबाट झण्डै ३०० जना उम्मेदवारलाई आचारसंहिता उल्लङ्घनको विषयमा स्पष्टीकरण सोधिएको छ । जसमध्ये केन्द्रीय निर्वाचन आयोग आफैँले ८२ जनासँग जवाफ मागेकोमा ५७ जनाले स्पष्टीकरण बुझाइसकेका छन् भने ६ जनाको जवाफ चित्तबुझ्दो नभएपछि पुनः स्पष्टीकरण सोधिएको छ ।
मुलुकभरबाट आयोगमा ३०० भन्दा बढी उजुरी प्राप्त भएको र तीमाथि छानबिन भइरहेको आयुक्त जबराले बताए । यसैबीच सञ्चार गृह तथा सञ्चारकर्मीहरूबाट भएको आचारसंहिता उल्लङ्घनका घटनामा कारबाही गर्न आयोगले प्रेस काउन्सिल नेपाललाई पत्राचार गरेको छ ।
काउन्सिलले प्रभावकारी कदम नचालेमा आयोग आफैँ सक्रिय भएर कारबाही प्रक्रिया अगाडि बढाउने चेतावनी समेत दिइएको छ ।