गाेरखा । धादिङमा मध्यराति भएको बस दुर्घटनामा परेर १७ जनाको ज्यान भएको छ । त्यस्तै दुर्घटनामा परेर अन्य २४ घाइते भएका छन् ।
राति करिब १:३० बजे धादिङ, बेनिघाट रोराङ्ग गाउँपालिका–५ भैंसिगौडास्थित पृथ्वी लोकमार्गमा पोखराबाट काठमाडौंतर्फ जादै गरेको ग १ ख १४२१ नम्बर यात्रुबाहक बस त्रिशूली नदीको किनारमा खसेर दुर्घटना भएको थियो ।
उक्त स्थानमा उद्धारका लागि सशस्त्र प्रहरी बल नेपालको विपद् व्यवस्थापन तालिम शिक्षालय कुरिनटारबाट गोताखोर सहितको टोली खटिएको छ । साथै नेपाल प्रहरी र सेनाको टोली पनि उद्धारमा खटिएको छ ।
ज्यान गुमाएका १७ जनाको शव घटनास्थलमा नै छ । राति भएकाले उद्धारमा कठिनाइ भएकाे प्रहरीहरूले बताएका छन् ।
यस्तै घाइते २४ जनालाई उद्धार गरेर विभिन्न अस्पताल लगिएको सशस्त्र प्रहरीका सशस्त्र प्रहरी नायब उपरिक्षक एवं सह-प्रवक्ता शैलेन्द्र थापाले बताए । घाइते तथा मृतकको सनाखत हुन बाँकी छ । दुर्घटनाको कारण खुलेको छैन ।