गोरखा । आउँदो फागुन २१ गते हुने प्रतिनिधिसभा सदस्य चुनावका लागि आवश्यक सम्पूर्ण मतपत्र छपाइको काम सम्पन्न भएको छ ।
जनक शिक्षा सामग्री केन्द्र लिमिटेडका प्रबन्ध निर्देशक यदुनाथ पौडेलले निर्वाचन आयोगले दिएको मतपत्र छपाइको सबै काम सोमबार बेलुकी सम्पन्न गरिएको जानकारी दिए ।
मंगलबारदेखि सबै मतपत्र ‘प्याकेजिङ’ सकेर सम्बन्धित प्रदेशमा ढुवानीको काम शुरु गरीएको पनि उनले बताए ।
प्रबन्ध निर्देशक पौडेलका अनुसार प्रत्यक्षतर्फ २ करोड ३ लाख मतपत्र छपाइ कार्य सोमबार बेलुकी सम्पन्न भएको छ । ४२ दिनको कार्यतालिका लिएर छपाइ शुरू गरिएकामा ४० दिनमै सम्पन्न गर्न सफल भएको उनले बताए ।
अब १० दिनभित्र सबै जिल्लामा मतपत्र पुर्याउने योजना बनाएको उनले सुनाए । केन्द्रले दैनिक १३ देखि १५ लाख मतपत्र छपाइ गर्दै आएको थियो ।
यसअघि १० लाख नमूना मतपत्र छपाइ सकेर आयोगले विभिन्न ठाउँमा पुर्याइसकेको छ भने २ करोड ८ लाख ३० हजार समानुपातिकतर्फको मतपत्र जिल्लामा पठाउने काम भइरहेको केन्द्रले जनाएको छ ।
प्रबन्ध निर्देशक पौडेलले कर्णाली र सुदूरपश्चिममा सबै मतपत्र पुगिसकेको र बाँकी क्षेत्रमा पनि १० दिनभित्र मतपत्र पुर्याउने गरी काम भइरहेको जानकारी दिए ।
तस्बिर प्रदिपराज वन्त
