एजेन्सी । इजरायलले सिरिया–लेबनान सीमा नजिकै एउटा गाडीमा हवाई आक्रमण गर्दा कम्तीमा पनि ४ जनाको ज्यान गएकाे छ ।
लेबनानको जनस्वास्थ्य मन्त्रालयका अनुसार उक्त आक्रमण सोमबार बिहान भएको हो । लेबनानको राष्ट्रिय समाचार एजेन्सीका अनुसार मृतकमध्ये १ जना खालिद मोहम्मद अल-अहमद नामका सिरियाली नागरिक रहेका छन् ।
इजरायली सेनाले सामाजिक सञ्जाल ‘एक्स’ मार्फत हवाई आक्रमणको पुष्टि गर्दै लेबनानमा रहेको प्यालेस्टिनी इस्लामिक जिहादका सदस्यहरूलाई लक्षित गरिएको दाबी गरेको छ । साथै मजदल अन्जार क्षेत्रमा छापा मारिएको पनि जनाएको छ ।
प्यालेस्टिनी इस्लामिक जिहाद कब्जा गरिएको प्यालेस्टिनी क्षेत्रमा सक्रिय एक सशस्त्र समूह हो, जसले प्यालेस्टिनी राज्य स्थापनाका लागि गाजामा हमाससँग मिलेर संघर्ष गरिरहेको छ । यो लेबनानी सशस्त्र समूह हिजबुल्लाहको सहयोगी पनि मानिदै आएकाे छ ।
सन् २०२३ मा गाजामा युद्ध सुरु भएपछि हिजबुल्लाहले प्यालेस्टिनीहरूसँग ऐक्यबद्धता जनाउँदै उत्तरी इजरायलतर्फ आक्रमण सुरु गरेको थियो । इजरायल र हिजबुल्लाहबीच नोभेम्बर २०२४ मा युद्धविराममा सहमति भएको थियो । तर लेबनानका अनुसार युद्धविरामपछि पनि इजरायली सेनाले प्रायः दैनिक रूपमा आक्रमण जारी राखेको छ ।
यसका साथै, इजरायलले लेबनानी भूभागका ५ क्षेत्र कब्जा गरिरहेको, सीमावर्ती गाउँहरूको पुनर्निर्माणमा अवरोध पुर्याएको तथा दशौं हजार विस्थापित नागरिकलाई आफ्नो घर फर्कन नदिएको आरोप लगाइएको छ ।