एजेन्सी । रुसी विपक्षी नेता तथा क्रेमलिनका कटु आलोचक एलेक्सी नभाल्नीको मृत्यु दक्षिण अमेरिकी ‘पोइजन डार्ट फ्रग’ (विषाक्त भ्यागुता) मा पाइने घातक विषका कारण भएको ५ युरोपेली देशले दाबी गरेका छन् ।
बेलायत, स्विडेन, फ्रान्स, जर्मनी र नेदरल्यान्ड्सले शनिबार एक संयुक्त विज्ञप्ति जारी गर्दै नभाल्नीको शरीरबाट लिइएका नमुनाहरूको विश्लेषण गर्दा एपिबेटिडिन नामक रसायनको उपस्थिति निर्णायक रूपमा पुष्टि भएको बताएका छन् ।
विज्ञप्तिमा यो विषाक्त पदार्थ रूसमा प्राकृतिक रूपमा नपाइने समेत उल्लेख गरेका छन् । २ वर्षअघि (सन् २०२४ मा) आर्कटिक सर्कलको उत्तरमा रहेको एक जेल (पेनल कोलोनी)मा नभाल्नीको ज्यान गएको थियो ।
५ युरोपेली राष्ट्रहरूले नभाल्नी जेलमा रहँदा उनलाई यो विष दिने साधन, मनसाय र अवसर मस्कोसँग मात्र भएको आरोप लगाएका छन् । उनीहरूले नभाल्नीको मृत्युमा योगदान पुर्याउने संयुक्त साधन केवल रुसी राज्यसँग मात्र रहेको जिकिर गरेका छन् ।
रुसी अधिकारीहरूले भने नभाल्नीको मृत्युमा आफ्नो कुनै जिम्मेवारी नरहेको कुरा बारम्बार दोहोर्याउँदै आएका छन् । रुसी समाचार एजेन्सी टासका अनुसार, विदेश मन्त्रालयकी प्रवक्ता मारिया जाखारोभाले भ्यागुताको विष प्रयोग गरिएको भन्ने दाबीलाई प्रचारबाजी भन्दै खारेज गरेकी छिन् ।
यो घोषणा जर्मनीमा आयोजित म्युनिख सुरक्षा सम्मेलनका क्रममा आएको हो । स्मरणीय छ कि, सन् २०२४ मा यही सम्मेलन चलिरहँदा नभाल्नीको मृत्युको घोषणा गरिएको थियो ।
शनिबार सोही सुरक्षा सम्मेलनमा बोल्दै नभाल्नीकी पत्नी युलिया नभाल्नायाले २ वर्षअघिको घटना स्मरण गरिन् । उनले भनिन्,’दुई वर्षअघि म यहाँ म्युनिखमा थिएँ । त्यो मेरो जीवनको सबैभन्दा भयानक दिन थियो । म मञ्चमा आएँ र भनें कि मेरा श्रीमान्, एलेक्सी नभाल्नीलाई विष दिइयो ।’